મહારાષ્ટ્રના મુંબઈમાં ભારે વરસાદને કારણે સામાન્ય લોકોની હાલત દયનીય છે. અહીં રેલવે ટ્રેક ડૂબી ગયો છે અને ઘણા ભાગોમાં પાણી ભરાઈ ગયા છે. રસ્તાઓ પર પાણી ભરાવાને કારણે વાહનવ્યવહાર પણ ખોરવાયો છે.
રાત્રે 1 વાગ્યાથી સવારે 7 વાગ્યા સુધીના છ કલાકમાં મુંબઈમાં 300 મિમીથી વધુ વરસાદ નોંધાયો હતો. જેના કારણે કેટલાક નીચાણવાળા વિસ્તારોમાં પાણી ભરાયા હતા. રેલવે ટ્રેક પર પાણી ભરાવાને કારણે લોકલ ટ્રેનો કલાકો મોડી ચાલી રહી છે. તે જ સમયે મુંબઈની તમામ BMC, સરકારી અને ખાનગી શાળાઓ અને કોલેજોમાં રજા જાહેર કરવામાં આવી છે. મહારાષ્ટ્રમાં પૂરને પહોંચી વળવા NDRFની ટીમો ઘણા જિલ્લાઓમાં પહોંચી ગઈ છે. ભારે વરસાદને કારણે ઘણા પ્રવાસીઓ રાયગઢ કિલ્લામાં પણ ફસાયેલા છે.
મધ્ય રેલવેએ જણાવ્યું હતું કે મુંબઈ ઉપનગરીય અને હાર્બર લાઈનો પર ભારે વરસાદને કારણે પાણી ભરાઈ જવાને કારણે રેલ ટ્રાફિકમાં વિલંબ થયો છે. અસરગ્રસ્ત સ્ટેશનો છત્રપતિ શિવાજી મહારાજ ટર્મિનસ, કુર્લા- વિક્રોલી અને ભાંડુપ છે.
ભારે વરસાદને ધ્યાનમાં રાખીને નાગરિકોને સતર્ક રહેવા માટે કહેવામાં આવ્યું છે અને અધિકારીઓ દ્વારા રાહત અને બચાવની તૈયારીઓ કરવામાં આવી રહી છે. ભારે વરસાદને કારણે પાણીનો ભરાવો વહીવટીતંત્ર માટે મોટો પડકાર છે. સીપીઆરઓએ જણાવ્યું કે ભારે વરસાદને કારણે મધ્ય રેલવેની ઉપનગરીય સેવાઓ પ્રભાવિત થઈ છે. સાયન અને ભાંડુપ અને નાહુર સ્ટેશનો વચ્ચેની ટ્રેન સેવા પ્રભાવિત થઈ છે. પાટા ઉપર વરસાદનું પાણી હતું જેથી ટ્રેનો લગભગ એક કલાક માટે રોકી દેવામાં આવી હતી, હવે પાણી થોડું ઓછું થઈ ગયું છે તેથી ટ્રેનો ફરી શરૂ થઈ રહી છે પરંતુ સેવાઓ હજુ પણ પ્રભાવિત છે.
થાણેમાં ભારે વરસાદને કારણે 150 લોકો ફસાયા, રેસ્ક્યૂ ચાલુ
મુંબઈ નજીક આવેલા થાણે જિલ્લામાં ભારે વરસાદને કારણે વાશિંદમાં સૃષ્ટિ ફાર્મ હાઉસની આસપાસ પાણી ભરાઈ ગયા હતા. લગભગ 150 લોકો ફસાયા છે. તેમનું રેસ્ક્યૂ ચાલુ છે. બીજી તરફ મહારાષ્ટ્રમાં સવારે 6.30 વાગ્યે કલ્યાણ-કસારા માર્ગ પર રેલવે ટ્રેક પર કાટમાળ પડતા ટ્રેક ખોરવાયો હતો. ટ્રેક પર એક ઝાડ પડ્યું હતું.
