મહાદેવ એપનો ભાગીદાર બાલમુકુંદ દુબઈ ભાગે તે પહેલાં અમદાવાદ એરપોર્ટથી ધરપકડ

‘સાહેબ મૈં તો જામીન પે હૂં’ કહીને પોલીસને ગોળ ગોળ ફેરવતા બાલમુકુંદ ઈનાની રાજસ્થાનના બે ગુનામાં વોન્ટેડ હતો અને તે હજારો કરોડના સટ્ટામાં સંડોવાયેલો હોવાની પણ વાતો સામે આવતી હતી. ત્યારે અમદાવાદ પોલીસના ડીસીપી કાનન દેસાઈએ આની ખરાઈ કરવા રાજસ્થાન પોલીસનો સંપર્ક કર્યો અને તે વોન્ટેડ હોવાનું ખબર પડતા તેની તાત્કાલિક ધરપકડ કરી લીધી હતી. ગણતરીના કલાકોમાં રાજસ્થાન પોલીસ અમદાવાદ આવી અને આરોપીને લઈને જતી રહી હતી.
પોલીસને જાણ હતી કે આવો કોઈ મોટો ગુનેગાર અમદાવાદ એરપોર્ટથી દુબઈ ભાગવાનો છે અને તેની ખાલી માહિતી હતી. પરંતુ તે દિવસે જ પ્રધાનમંત્રી નરેન્દ્ર મોદી આ એરપોર્ટ પર આવવાના હતા. જેના માટે પોલીસ બંદોબસ્તમાં વ્યસ્ત હતી. પણ આરોપીને પકડવો એટલો જ જરૂરી હતો અને અમદાવાદ પોલીસે કલાકોની મહેનત બાદ આરોપીને પકડીને રાજસ્થાન પોલીસને સોંપી દીધો છે. બાલમુકુંદ ઇનાની મહાદેવ એપના માલિક સૌરભ ચંદ્રાકરનો પૂર્વ પાર્ટનર હતો. તે રાજસ્થાનના ચિત્તોડગઢના કપાસન નગરપાલિકાનો કોંગ્રેસનો કોર્પોરેટર છે. મહાદેવ એપ બાદ જોગણિયા બુક નામની એપ દ્વારા દેશવ્યાપી સટ્ટો રમાડતો હતો. બાલમુકુંદ 2000થી 3000 કરોડની સટ્ટાની રકમનું ટર્નઓવર કરે છે.