આજથી રાજ્યસભામાં બંધારણ પર વિશેષ ચર્ચા : ‘એક દેશ, એક ચૂંટણી’ બિલ લોકસભામાં મોકૂફ

શિયાળુ સત્રના 16મા દિવસે સોમવારે રાજ્યસભામાં બંધારણ પર બે દિવસીય વિશેષ ચર્ચા શરૂ થશે. ગૃહમંત્રી અમિત શાહ ગૃહમાં તેની પહેલ કરી શકે છે. વિપક્ષ તરફથી, રાજ્યસભામાં વિપક્ષના નેતા મલ્લિકાર્જુ ખરેગે ચર્ચાની શરૂઆત કરી શકે છે. મળતી માહિતી મુજબ વડાપ્રધાન નરેન્દ્ર મોદી મંગળવારે ચર્ચામાં ભાગ લેશે.
તે જ સમયે, સરકારે ‘એક દેશ, એક ચૂંટણી’ સંબંધિત બિલને લોકસભામાં રજૂ કરવાનું કામ નાણાકીય કાર્ય પૂર્ણ થયા પછી સ્થગિત કરી દીધું છે. અગાઉ બંધારણ (129મો સુધારો) ખરડો અને કેન્દ્રશાસિત પ્રદેશ કાયદા (સુધારા) બિલ સોમવારે લોકસભામાં રજૂ કરવા માટે સૂચિબદ્ધ હતા. સરકારી સૂત્રોએ જણાવ્યું હતું કે સોમવારે સૂચિબદ્ધ પૂરક અનુદાન માંગણીઓના પ્રથમ રાઉન્ડને ગૃહ પસાર કરે તે પછી આ બિલ રજૂ કરી શકાય છે. લોકસભા સચિવાલય દ્વારા જારી કરાયેલ સંશોધિત એજન્ડામાં સોમવારના કાર્યસૂચિમાં બંને બિલનો સમાવેશ કરવામાં આવ્યો નથી.
જો કે, સરકાર હંમેશા છેલ્લી ઘડીએ પણ લોકસભા અધ્યક્ષની પરવાનગી સાથે પૂરક એજન્ડા દ્વારા કાયદાકીય કાર્યસૂચિ ઉમેરી શકે છે. પ્રક્રિયાના નિયમો મુજબ, ગયા અઠવાડિયે જ ‘એક દેશ, એક ચૂંટણી’ના અમલ સાથે સંબંધિત બંને બિલની નકલો લોકસભાના સભ્યોમાં વહેંચવામાં આવી હતી. નોંધનીય છે કે સંસદનું શિયાળુ સત્ર 20 ડિસેમ્બરે સમાપ્ત થશે.