ગુજરાતમાં સ્થાનિક સ્વરાજ્યની ચૂંટણી માટે ચાલતી ચર્ચાઓ અને પ્રક્રિયા ચાલતી હતી આખરે ચૂંટણીનું બ્યુગલ ફુંકાતા હવે તેનો અંત આવ્યો છે. સામાન્ય ચૂંટણી સાથે ભાવનગર મહાનગરપાલિકાની વડવા-બ વોર્ડ તેમજ ભાવનગર જિલ્લાના ત્રણ તાલુકાની પાંચ બેઠકની પેટા ચૂંટણી અને સાથે સાથે ત્રણ નગરપાલિકાની સામાન્ય ચૂંટણી આગામી 16 મી ફેબ્રુઆરીએ યોજાશે.
રાજ્યની જૂનાગઢ મહાનગરપાલિકા અને ભાવનગરની સિહોર, ગારીયાધાર અને તળાજા મળી 66 નગરપાલિકામાં ચૂંટણીનું આગામી 16 મી ફેબ્રુઆરીએ મતદાન થશે. જેની જાહેરાત ગત સાંજે થતા જ આચારસંહિતાનો અમલ શરૂ કરવામાં આવ્યો છે. બોટાદ નગરપાલિકાની મધ્ય સત્ર ચૂંટણી યોજાશે. સામાન્ય સાથે જે પાલિકા અને પંચાયતમાં બેઠકો ખાલી પડી છે ત્યાં પણ પેટા ચૂંટણી યોજાશે.
ભાવનગર મહાનગરપાલિકાના વોર્ડ નંબર 3 વડવા બ વોર્ડમાં નગરસેવકના મૃત્યુ બાદ ખાલી પડેલી એક જગ્યાની પેટા ચૂંટણી યોજાશે. ભાવનગર સહિત રાજ્યમાં 21 નગરપાલિકાની, 9 જિલ્લા પંચાયતની અને 91 તાલુકા પંચાયતની બેઠકો પર પેટા ચૂંટણી યોજવાની જાહેરાત કરવામાં આવી છે.
બોટાદ જિલ્લાની ગઢડા નગરપાલિકાની પણ ચૂંટણી યોજાશે. જ્યારે ભાવનગર જિલ્લાની તળાજા તાલુકા પંચાયતની ઉંચડી અને નવાજૂના રાજપરા, ભાવનગર ગ્રામ્ય તાલુકા પંચાયતની લાખણકા અને સિહોર તાલુકા પંચાયતની વળાવડ તેમજ સોનગઢ બેઠક પર પેટા ચૂંટણી યોજવામાં આવશે.
ભાવનગર સહિત ગુજરાત રાજ્યમાં સ્થાનિક સ્વરાજ્યની સામાન્ય અને પેટા ચૂંટણી માટે 27મી જાન્યુઆરીએ જાહેરનામું પ્રસિદ્ધ કરવામાં આવશે. 1લી ફેબ્રુઆરી ઉમેદવારી પત્રો ભરવાનો અંતિમ દિવસ રહેશે. 3જી ફેબ્રુઆરીએ ઉમેદવારી પત્રો ચકાસણી અને 4થી ફેબ્રુઆરી સુધી ઉમેદવારી પત્ર પરત ખેંચી શકાશે.
