દિલ્હીના બુરાડીમાં 4 માળની ઇમારત ધરાશાયી થતા 2ના મોત, 12 ઘાયલ

દિલ્હીના બુરાડી વિસ્તારમાં ગઈકાલે એટલે કે સોમવારે, 27 જાન્યુઆરી 2025ના રોજ સાંજે નિર્માણાધીન ચાર માળની ઇમારત ધરાશાયી હતી. ઘટના સમયે લગભગ દસથી પંદર મજૂરો અને તેમના પરિવારના સભ્યો ઇમારતમાં હાજર હતા. અત્યાર સુધીમાં બે લોકોના મોત થયા છે. ધરાશાયી થયેલી ઇમારત નીચે ઘણા લોકો દટાયા હતા અને તેને બુરાડીની સરકારી હોસ્પિટલમાં દાખલ કરવામાં આવ્યા છે.
બુરાડી અકસ્માતમાં 7 વર્ષની બાળકી રાધિકાનું અને સાધના નામની 17 વર્ષની છોકરીનું અવસાન થયું છે. બચાવ ટીમ ઘટનાસ્થળે પહોંચે તે પહેલાં જ સ્થાનિક લોકોએ કાટમાળ નીચે ફસાયેલા ચાર લોકોને બચાવી લીધા હતા. તેને નજીકના હોસ્પિટલમાં લઈ જવામાં આવ્યા છે. સ્થાનિક લોકો સાથે મળીને બચાવ ટીમ રાહત કાર્યમાં રોકાયેલી છે. મોડી રાત્રે કાટમાળમાંથી વધુ છ લોકોને બચાવી લેવામાં આવ્યા અને તેને હોસ્પિટલમાં લઈ જવામાં આવ્યા છે. કાટમાળ નીચે હજુ ઘણા લોકો ફસાયેલા હોવાની શક્યતા છે.
સ્થાનિક રહેવાસી રામ નિવાસે જણાવ્યું હતું કે મજૂરોએ મકાનના ખાલી પ્લોટમાં રહેવા માટે ચાર ઝૂંપડા બનાવ્યા હતા. ઇમારતનો કાટમાળ પણ ઝૂંપડપટ્ટી પર પડ્યો છે. અહીં કેટલા લોકો હાજર હતા તે હજુ સુધી જાણી શકાયું નથી. પોલીસ અહીં કામ કરાવતા કોન્ટ્રાક્ટર અને મકાનમાલિકને શોધી રહી છે. તેમજ ફાયર વિભાગના ડિરેક્ટર અતુલ ગર્ગે જણાવ્યું હતું કે નવ ફાયર એન્જિન ઘટનાસ્થળે હાજર છે અને ફાયર ફાઇટરો રાહત અને બચાવ કાર્ય કરી રહ્યા છે. ફાયર ફાઇટર્સ કાટમાળ નીચે ફસાયેલા લોકોને સુરક્ષિત રીતે બહાર કાઢવાનો પ્રયાસ કરી રહ્યા છે.