બુધવારે, જેસલમેરમાં દિવસનું મહત્તમ તાપમાન 46 ડિગ્રી સેલ્સિયસ સુધી પહોંચ્યું હતું, જે છેલ્લા 6 વર્ષમાં એપ્રિલમાં સૌથી વધુ તાપમાન હતું. રાજસ્થાનમાં ભીષણ ગરમી અને લુ ફુંકાવાનું ચાલુ છે. હવામાન વિભાગે આજે જયપુર અને જોધપુર સહિત 17 જિલ્લાઓમાં હીટવેવની ચેતવણી આપી છે આમાંથી 4 જિલ્લાઓ માટે રેડ એલર્ટ છે. મધ્યપ્રદેશમાં પણ વરસાદ બાદ ગરમીની અસર વધી છે. બુધવારે રાજ્યના 9 શહેરોમાં દિવસનું તાપમાન 40 ડિગ્રીને પાર કરી ગયું હતું. રતલામ સૌથી ગરમ હતું. જ્યાં તાપમાન 42.6 ડિગ્રી નોંધાયું હતું. આજે ભોપાલ, ઇન્દોર, ઉજ્જૈન, ગ્વાલિયર અને જબલપુરમાં પણ તાપમાન વધી શકે છે.
તેલંગાણાના 28 જિલ્લાઓમાં ઓછામાં ઓછા 15 દિવસ સુધી લુ ફુંકાવાની શક્યતા છે. આને ધ્યાનમાં રાખીને, સરકારે લુને આપત્તિ જાહેર કરી છે. ગરમીના કારણે મૃત્યુ પામેલા લોકોના પરિવારને સરકારે 4 લાખ રૂપિયાની સહાયની જાહેરાત કરવામાં આવી છે. તેલંગાણા કદાચ આવું કરનાર દેશનું પ્રથમ રાજ્ય હશે.ગરમી વચ્ચે હવામાન વિભાગે યુપી અને બિહાર સહિત દેશના 24 રાજ્યોમાં વાવાઝોડા અને વરસાદની આગાહી કરી છે. ઝારખંડ, પશ્ચિમ બંગાળ, આસામ અને બિહારમાં ભારે વરસાદની શક્યતા છે. તેમજ, છત્તીસગઢમાં કરા પડવાની અને બિહાર અને પશ્ચિમ બંગાળના કેટલાક વિસ્તારોમાં વીજળી પડવાની ચેતવણી આપવામાં આવી છે.
બીજી તરફ, બુધવારે ચેન્નઈમાં ભારે વરસાદ પડી ગયો હતો. જમ્મુમાં પણ અચાનક હવામાન પલટાયું હતું. ભારે પવન અને વરસાદને કારણે સિવિલ સચિવાલયની બાઉન્ડ્રી વોલનો એક ભાગ પડી ગયો હતો. દિવાલ પડતા ઘણા વાહનો ઝપેટમાં આવી ગયા હતા. જો કે, કોઈને ઈજા થઈ ન હતી. કરા અને વરસાદ અને ભૂસ્ખલન પછી રાજૌરી જિલ્લા નજીક જમ્મુ-પુંછ નેશનલ હાઈવે બંધ કરવામાં આવ્યો હતો.
