દિલ્હી-UP-છત્તીસગઢમાં વરસાદ અને વીજળીથી 10નાં મોત

દેશભરમાં હવામાન બદલાયું છે. ગુરુવાર રાતથી દિલ્હી એનસીઆરમાં ભારે પવન અને ધૂળની આંધી ફૂંકાઈ રહી છે. રાજધાની દિલ્હીમાં વાવાઝોડાને કારણે ઘણી જગ્યાએ વૃક્ષો પડી ગયા છે અને ભારે વરસાદને કારણે પાણી ભરાઈ ગયા છે. આ દરમિયાન, વૃક્ષો પડવાથી 4 લોકોના મોત થયાના અહેવાલ છે.ખરાબ હવામાનને કારણે દિલ્હી એરપોર્ટ પર ફ્લાઇટ્સ પર પણ અસર પડી છે. 100થી વધુ ફ્લાઇટ્સ મોડી પડી છે. 3 ફ્લાઇટ્સ પણ ડાયવર્ટ કરવી પડી.
ગુરુવારે પશ્ચિમ બંગાળના સંદકફુમાં નવેસરથી હિમવર્ષા થઈ. જમ્મુમાં ભારે વરસાદ પડ્યો છે. ઉત્તર પ્રદેશમાં વીજળી પડવાથી 4 લોકોના મોત થયા છે. ગુરુવાર રાતથી સહારનપુર, મથુરા સહિત રાજ્યના 10 શહેરોમાં ભારે પવન સાથે ભારે વરસાદ પડી રહ્યો છે. છત્તીસગઢના બેમેતારા જિલ્લામાં પણ વાવાઝોડાને કારણે બે લોકોના મોત થયા છે.
ગુરુવારે અગાઉ જયપુર, જેસલમેર, ભીલવાડા અને પાલીમાં ઘણી જગ્યાએ વાવાઝોડા અને કરા સાથે વરસાદ પડ્યો હતો. હવામાન વિભાગે આજે રાજસ્થાનના 30 જિલ્લાઓમાં વાવાઝોડા અને વરસાદની ચેતવણી જારી કરી છે. હવામાન વિભાગના જણાવ્યા અનુસાર, શુક્રવારે મધ્યપ્રદેશ, છત્તીસગઢ, ઉત્તરાખંડ, ઓડિશા, નાગાલેન્ડ, મણિપુર, મિઝોરમ, ત્રિપુરામાં કરા પડી શકે છે. જ્યારે રાજસ્થાન, હરિયાણા, ચંડીગઢ, દિલ્હી અને પંજાબમાં ધૂળની આંધી આવશે.