ગુજરાતમાં માવઠા બાદ હવે શિયાળાની ઠંડીનો રાઉન્ડ શરૂ થયો છે. રાજ્યના અનેક સ્થળોએ તાપમાનનો પારો 20 ડી.સે.થી નીચો જતો રહ્યો હતો. છેલ્લા 24 ક્લાક દરમિયાન રાજ્યનું હવામાન સૂકું રહ્યું હતું. છેલ્લા ૨૪ કલાકમાં નોંધાયેલું મહત્તમ તાપમાન ૩૨.૪ ડિ. સે. હતું, જે સામાન્ય કરતાં ૨.૧ ડિ. સે. ઓછું હતું. જ્યારે લઘુત્તમ તાપમાન ૧૭ ડિ. સે. નોંધાયું હતું, જે સામાન્ય તાપમાન કરતાં ૧.૧ ડિ. સે. ઓછું રહ્યું હતું. ગુરુવારે, ગુજરાત પ્રદેશમાં રાત્રિના તાપમાનમાં નોંધપાત્ર ઘટાડો જોવા મળ્યો હતો, જ્યારે સૌરાષ્ટ્ર-કચ્છમાં કોઈ મોટો ફેરફાર નહોતો. સમગ્ર પ્રદેશમાં તાપમાન સામાન્યથી ઓછું નોંધાયું હતું. સૌથી નીચું ૧૬ ડિ. સે. લઘુત્તમ તાપમાન ડીસા અને નલિયા ખાતે નોંધાયું હતું.
હવામાન વિભાગ દ્વારા આગામી ૭ દિવસ એટલે તા.૧૪ સુધી માટે રાજ્યમાં વાતાવરણ સૂકું રહેવાની આગાહી કરવામાં આવી છે. આ સમયગાળા દરમિયાન કોઈ વરસાદની સંભાવના નથી, જેના કારણે ખેડૂતોને રાહત મળી છે. જો કે, રાત્રિના તાપમાનમાં ઘટાડો થવાની અને ઠંડીનો ચમકારો વધવાની સંભાવના છે. મહત્તમ તાપમાન ૨૭ ડિ. સે. થી ૩૫ ડિ. સે. ની વચ્ચે અને લઘુત્તમ તાપમાન ૧૬ ડિ. સે થી ૨૦ ડિ. સેની આસપાસ રહેવાની સંભાવના છે.છેલ્લા 24 કલાક દરમિયાન ભુજમાં દિવસના તાપમાનનો પારો ૩૫ ડિ. સે અને રાત્રિના તાપમાનનો પારો ૧૯ ડિ. સે, નલિયામાં ૩૩ ડિ. સે અને ૧૬ ડિ. સે, અમરેલીમાં ૩૨ ડિ. સે અને ૧૭ ડિ. સે, ભાવનગરમાં ૩૧ ડિ. સે અને ૨૦ ડિ. સે, પોરબંદરમાં ૩૩ ડિ. સે અને ૨૦ ડિ. સે, રાજકોટમાં ૩૪ ડિ. સે અને ૧૯ ડિ. સે, સુરેન્દ્રનગરમાં ૩૩ ડિ. સે અને ૧૯ ડિ. સે, મહુવામાં ૩૧ ડિ. સે અને ૧૮ ડિ. સે, અમદાવાદમાં ૩૨ ડિ. સે અને ૧૭ ડિ. સે, ડીસામાં ૩૪ ડિ. સે અને ૧૬ ડિ. સે., વડોદરામાં ૩૨ ડિ. સે. અને ૧૭ ડિ. સે., અને સુરતમાં ૩૨ ડિ. સે અને ૨૦ ડિ. સે તાપમાન નોંધાયું હતું.
ત્રણ દિવસ કાતિલ ઠંડી પડશે હવામાન વિભાગની આગાહી
ગુજરાતના કેટલાક વિસ્તારોમાં અત્યારે ઠંડી પડવાની શરૂઆત થઈ ગઈ છે. પર્વતો પરથી ફૂંકાતા શીત પવનોના કારણે ઉત્તર ભારતના અનેક રાજ્યોમાં લઘુત્તમ તાપમાન ઘટી રહ્યું છે. તેની અસર હવે ગુજરાતમાં પણ દેખાઈ રહી છે. હવામાન વિભાગે આગાહી કરી છે કે આગામી ત્રણ દિવસ દરમિયાન રાજ્યભરમાં તાપમાનમાં 2થી 3 ડિગ્રી સેલ્સિયસનો ઘટાડો થશે. આ ઘટાડાને કારણે ઠંડીનો ચમકારો વધશે અને હાડ થીજાવતી ઠંડીનો અનુભવ થશે. તાપમાનમાં થનારા આ ઘટાડાને કારણે રાજ્યભરમાં ઠંડીના પ્રમાણમાં નોંધપાત્ર વધારો થશે.
