દર મહિનાની 1 તારીખે ઓઇલ માર્કેટિંગ કંપનીઓ દ્વારા એલપીજી સિલિન્ડરના ભાવની સમીક્ષા કરવામાં આવે છે. 1 સપ્ટેમ્બરે પણ નવા દરો જાહેર કરવામાં આવશે, જે સીધી રીતે રસોડાના બજેટ પર અસર પાડશે. ઓગસ્ટ મહિનાની 1 તારીખે કંપનીઓએ 19 કિલોના કમર્શિયલ ગેસ સિલિન્ડરમાં 202 રૂપિયાનો ઘટાડો કર્યો હતો, જ્યારે 14.2 કિલોના ઘરગથ્થુ સિલિન્ડરના ભાવ સ્થિર રાખ્યા હતા. આ વખતે ભાવ વધે છે કે ઘટે છે તેના પર સૌની નજર રહેશે.
ઘરગથ્થુ એલપીજી સિલિન્ડર નિયમિતપણે મેળવવા માટે ઇ-કેવાયસી (e-KYC) પ્રક્રિયા પૂર્ણ કરવી અનિવાર્ય છે. IOCL, BPCL અને HPCL એ e-KYC ની અંતિમ તારીખ 23 ઓગસ્ટથી વધારીને 31 ઓગસ્ટ કરી હતી. જો 31 ઓગસ્ટ સુધીમાં આ પ્રક્રિયા પૂર્ણ કરવામાં નહીં આવે, તો 1 સપ્ટેમ્બરથી સિલિન્ડર મેળવવામાં મુશ્કેલી પડી શકે છે અથવા મોંઘા ભાવે સિલિન્ડર ખરીદવો પડી શકે છે.
ઓઇલ માર્કેટિંગ કંપનીઓ મહિનાના પહેલા દિવસે એર ટર્બાઇન ફ્યુઅલ (ATF) ના દરો પણ સુધારે છે. એટીએફના ભાવમાં થતા ફેરફારની સીધી અસર હવાઈ મુસાફરીના ભાડા પર પડે છે. 1 સપ્ટેમ્બરના રોજ એટીએફના નવા દરો સાથે સીએનજી (CNG) અને પીએનજી (PNG) ના ભાવમાં પણ સુધારો જોવા મળી શકે છે, જેનાથી વાહનચાલકો અને રસોડાના ગેસ વપરાશકર્તાઓ પર અસર પડશે.
