ભાવનગર, તા. 13
ભાવનગરના કલેકટર યોગેશ નીરગુડેની બદલી અને નવા કલેકટર પદે ગુજરાતી આઈએએસ એવા રમેશ મેરજાની નિમણૂકનો ઓર્ડર હજુ ગઈકાલે સાંજે જ થયો. ત્યાં આજે ઉઘડતી કચેરીએ જ નવા કલેકટરે હાજર થઈ પોતાનો ચાર્જ સંભાળી લીધો હતો. અગાઉ પાલીતાણા ખાતે ડેપ્યુટી કલેકટર રહી ચૂકેલા મેરજા માટે ભાવનગર જાણીતું છે, તેઓ ભૌગોલિક સ્થતિથી સારી રીતે જાણીતા છે આથી નિર્ણયો અને વહીવટી કામમાં ગતિશીલતા જોવા મળશે તેવો આશાવાદ છે. આમેય, વિધાનસભા ચૂંટણી માથા પર છે ત્યારે તેમની સામે પડકાર વધુ રહેશે.
ગુજરાતની 2012ની બેચના આઇએએસ રમેશ મેરજા અમદાવાદ મ્યુનસિપાલિટીમાં ડે.કમિશનર હતા, અગાઉ તેઓ પાટણ ડીડીઓ તરીકે કામગીરી કરી ચૂક્યા છે. મેરજા સરકારની ગુડ બુકમાં હોવાનું મનાય છે. ગઈકાલે સાંજે બદલીના ઓર્ડર મળતા જ આજે બીજા દિવસે તેમણે ભાવનગર આવી કલેકટર તરીકેનો ચાર્જ સંભાળવાની ગતિવિધિ પૂર્ણ કરી હતી. કલેકટરેટના અધિકારીઓએ સ્વાગત કરીને શુભકામનાઓ પાઠવી હતી. જયારે બદલી પામેલા પૂર્વ કલેકટર યોગેશ નીરગુડેને પણ શુભેચ્છાઓ અપાઈ હતી.
આઈએએસ નીરગુડે કલેકટર પદ પૂર્વે ભાવનગર પ્રાદેશિક કમિશનર પદે હતા. આમ તેઓ લાંબા સમયથી ભાવનગર હતા. કલેકટર પદે તેમણે સવા વર્ષ ફરજ બજાવી છે, તે દરમિયાન 6 મહિના સુધી મ્યુ.કમિશનરનો ચાર્જ પણ વહન કર્યો હતો.
