મહુવા પંથકમાં ઘરફોડ ચોરી કરનાર તસ્કર ત્રિપુટીની ધરપકડ

મહુવા તાલુકાના ગ્રામ્ય વિસ્તારોમાં ઘરફોડ ચોરી કરતા ત્રણ રીઢા તસ્કરોને મહુવા પોલીસે ઝડપી લઇ ચોરી કરેલ રૂ. ૭ લાખ ઉપરાંત નો મુદ્દામાલ કબજે કર્યો હતો. ઝડપાયેલ તસ્કર ત્રિપુટી અગાઉ ઘરફોડ ચોરી તેમજ હનીટ્રેપના ગુનામાં પણ સંડોવાયેલા હોવાનું પોલીસ તપાસમાં ખુલ્લું હતું.
મહુવા પોલીસ કાફલો મહુવા શહેરના વીટીનગર રોડ, મંગલમૂર્તિ સ્કૂલ તરફ જવાના રસ્તા ઉપર વાહન ચેકિંગમાં હતો તે દરમિયાન મોટરસાયકલ ઉપર ત્રણ સવારીમાં આવી રહેલા દર્શન દિનેશભાઈ ગોસ્વામી રહે. મહુવા, રવિ ભુપતભાઈ પરમાર રહે. સરદાર નગર, મહુવા અને મહેશ જીતુભાઈ બારૈયા રહે. ઇન્દિરા નગર મહુવા વાળાને અટકાવી તેમની તલાશી લેતા તેમની પાસેથી સોના ચાંદીના દાગીના મળી આવ્યા હતા.
પોલીસે ઉકત શખ્સોની પૂછપરછ કરતા તેમણે દસ દિવસ પહેલા મહુવાના બહારપરા વિસ્તારમાં ચોરી કરી હતી તેના આ ઘરેણા હોવાનું જણાવતા મહુવા પોલીસે ત્રણેયની અટક કરી સોના ચાંદીના ઘરેણા, મોટર સાયકલ મળી કુલ રૂપિયા ૭,૦૩,૫૦૦ નો મુદ્દામાલ કબજે કરી કાયદેસર કાર્યવાહી હાથ ધરી હતી.
ઝડપાયેલા ત્રણેય શખ્સની પૂછપરછ કરતા તેમણે મહુવા પોલીસ મથક વિસ્તારમાં અલગ અલગ પાંચ સ્થળોએ ચોરી કરી હોવાની કબુલાત આપી હતી, તેમજ ઝડપાયેલા ત્રણેય ઈસમો અગાઉ પાંચ જેટલી ચોરી અને એક હનીટ્રેપના ગુનામાં પણ અગાઉ ઝડપાયા હોવાનું જણાવ્યું હતું.