નવા વાહનની નંબર પ્લેટને લઈને રાજ્ય સરકાર મહત્વનું પગલુ ભરવા જઈ રહી છે. ગ્રાહકોએ નવા વાહનની ખરીદી બાદ નંબર માટે રાહ જોવી પડશે નહીં, જે દિવસે વાહન ખરીદશો તે જ દિવસે વાહનમાં નંબર પ્લેટ ફીટ થઈ જશે. કેન્દ્ર સરકારની મંજૂરી મળ્યા બાદ આ નિર્ણયને અમલમાં મુકાશે. સૂત્રોના જણાવ્યા અનુસાર, વાહન વ્યવહાર વિભાગ 15 દિવસની અંદર જ આ ઠરાવ બહાર પાડી શકે છે.
આ નિર્ણય બાદ ગ્રાહકોને RTOના ધક્કા ખાવામાંથી મુક્તિ મળશે. આ નિયમ હેઠળ રેન્ડમાઇઝેશન ઉપરાંત પસંદગીના નંબર માટે પણ વાહનોના ખરીદારોને લાંબો સમય રાહ જોવી નહીં પડે. આ નિર્ણયના અમલ મુદ્દે રાજ્ય સરકારની કેન્દ્ર સરકાર સાથે વાતાઘાટો ચાલી રહી છે. રાજ્યમાં વર્તમાન સમયમાં નવા વાહનની ખરીદી બાદ તેના દસ્તાવેજો રજિસ્ટ્રેશન માટે ઓનલાઈ RTO કચેરી ખાતે મોકલવામાં આવે છે, જેની ચકાસણી કર્યા પછી RTO કચેરી નંબર ફાળવે છે અને આ નંબરની HSRP તૈયાર કરવા ગાંધીનગર સ્થિત નંબર પ્લેટ કંપનીમાં નંબરની યાદી મોકલી આપે છે. જે બાદ અહીં નંબર પ્લેટ તૈયાર થાય છે અને અહીંથી નંબર પ્લેટ આવ્યા બાદ વાહન માલિકોને જાણ કરવામાં આવે છે. આ સમગ્ર પ્રક્રિયામાં 8થી 10 દિવસ જેટલો સમય લાગી જાય છે.
ડીલરને ત્યાં જ પસંદગીના નંબરથી લઈને ઉપલબ્ધ નંબરની શ્રેણી ઉપલબ્ધ કરાવવામાં આવશે
હાલ પસંદગીનો નંબર મેળવવા માટે RTOની એપ્લિકેશન કે વેબસાઈટ પર ઓનલાઈન સિસ્ટમની મદદ લેવી પડતી હોય છે અને પેમેન્ટ પણ કરવું પડતું હોય છે. ત્યારે હવે કાર ખરીદતી વખતે ગ્રાહકોને ડીલરને ત્યાં જ પસંદગીના નંબરથી લઈને ઉપલબ્ધ નંબરની વિશાળ શ્રેણી ઉપલબ્ધ કરાવવામાં આવશે. જરૂરી ફી ભર્યાં બાદ તે નંબર તેમને તરત જ મળી રહેશે. RTO તંત્ર આ દિશામાં આગળ વધી રહ્યું છે. સરકાર નંબર પ્લેટ બનાવવા માટેની સુવિધા પણ વધારવા જઇ રહી છે.
