વડાપ્રધાન નરેન્દ્ર મોદી શુક્રવારે મહારાષ્ટ્રને બે વંદે ભારત એક્સપ્રેસ ભેટ આપશે. એક વંદે ભારત મુંબઈથી સાઈનગર શિરડી અને બીજી મુંબઈથી સોલાપુર સુધી દોડશે. PM છત્રપતિ શિવાજી મહારાજ ટર્મિનસના પ્લેટફોર્મ નંબર-18 પરથી બંને હાઈસ્પીડ ટ્રેનોને લીલી ઝંડી બતાવશે. આ ટ્રેન મુંબઈથી શિરડી સાંઈબાબા અને મુંબઈથી પંઢરપુર જતા શ્રદ્ધાળુઓ માટે વરદાન સાબિત થશે.
PM મોદી મુંબઈની તેમની એક દિવસીય મુલાકાત દરમિયાન વંદે ભારત ટ્રેનને લીલી ઝંડી બતાવ્યા બાદ સાંતાક્રુઝ-ચેમ્બુર લિંક રોડ અને કુરાર અંડરપાસનું ઓનલાઈન ઉદ્ઘાટન કરશે. આ પછી તે શિવાજી મહારાજ ટર્મિનસથી INS શિકરા જશે. ત્યારબાદ રોડ માર્ગે વડાપ્રધાન મુંબઈ ઉપનગરમાં મરોલ જશે. તેઓ 4.30 વાગ્યાની આસપાસ મરોલ ખાતે અલજામિયા-તુસ-સૈફીયાહ (સૈફી એકેડમી)ના નવા કેમ્પસનું ઉદ્ઘાટન કરશે. અલજામિયા-તુસ-સૈફિયા એ દાઉદી બોહરા સમુદાયની અગ્રણી શૈક્ષણિક સંસ્થા છે. વડાપ્રધાન સાંજે જ દિલ્હી જવા રવાના થશે.
પીએમ મોદી જે બે વંદે ભારત એક્સપ્રેસ ટ્રેનને લીલી ઝંડી આપશે તે યાત્રાધામોની યાત્રાને સરળ બનાવશે. મુંબઈ-સાઈનગર શિરડી વંદે ભારત ટ્રેન દેશની 10મી વંદે ભારત ટ્રેન હશે. આ ટ્રેન મહારાષ્ટ્રના નાસિક, ત્ર્યંબકેશ્વર, સાઈનગર શિરડી, શનિ શિંગણાપુર જેવા મહત્વના તીર્થસ્થાનોની યાત્રા કરશે. જ્યારે, મુંબઈથી સોલાપુર વચ્ચે વંદે ભારત એક્સપ્રેસ મહત્વના તીર્થસ્થાનો જેવા કે સિદ્ધેશ્વર, સોલાપુર નજીક અક્કલકોટ, તુલજાપુર, પંઢરપુર અને પૂણે નજીક આલંદી સુધી ઉત્તમ મુસાફરી સુવિધા પૂરી પાડશે.
