પર્યાવરણના દુશ્મન એવા પ્રતિબંધિત પ્લાસ્ટીકનો વપરાશ બંધ કરાવવા કમિશનર અને કોર્પોરેશન તંત્ર મથી રહ્યું છે પરંતુ બુદ્ધિજીવીમાં ગણાતા મિઠાઇ અને ફરસાણના વેપારીઓ શુદ્ધા ગાંઠતા નથી. પરિણામે ખુદ મ્યુ. કમિશનર મેદાને ઉતરીને સ્વીટ અને ફરસાણની દુકાનોમાં જઇ જઇને ચેકીંગ કરી રહ્યા છે અને પ્રતિબંધિત પ્લાસ્ટીકનો જથ્થો પકડી પાડી દંડ ફટકારી રહ્યા છે. ગઇકાલે કાળાનાળામાં નામાંકિત પેઢીઓને ઝપટે લીધા બાદ આજે કમિશનરે લીલાસર્કલથી સિદસર રોડ પર ચેકીંગ હાથ ધરી પાંચથી છ આસામીને પ્રતિબંધિત પ્લાસ્ટીક જથ્થા સાથે ઝડપી લઇ દંડ કરાવ્યો હતો. જ્યારે ૪૦ કિલોથી વધુ પ્રતિબંધિત પ્લાસ્ટીકનો જથ્થો જપ્ત કરાયો હતો.
કમિશનર એન.વી. ઉપાધ્યાયે આજે સવારે લીલાસર્કલથી પ્રતિબંધિત પ્લાસ્ટીક અંગે ચેકીંગ હાથ ધર્યું હતું જેમાં લીલાસર્કલમાં મેરે કાન્હાથી શરૂ કરી સિદસરની બોર્ડર પર સીતારામ કાઠીયાવાડી રેસ્ટોરન્ટને ચેકીંગમાં આવરી લેવાયેલ જેમાં પંડ્યા સ્વીટ એન્ડ ફરસાણ, દાદાની વાડી તથા સીતારામ કાઠીયાવાડી રેસ્ટોરન્ટમાંથી પ્રતિબંધિત પ્લાસ્ટીકનો મસમોટો જથ્થો મળી આવ્યો હતો આથી જથ્થો જપ્ત લેવડાવી ત્રણેય પેઢીને રૂા.૫-૫ હજારનો દંડ ફટકારવામાં આવ્યો હતો. જ્યારે અન્ય આસામીઓને રૂા.૨-૨ હજાર દંડ કરવામાં આવેલ. આ ઉપરાંત કમિશનરના રાઉન્ડ વખતે સિદસર રોડ પર ત્રણ નાગરિકો દ્વારા જાહેરમાં કચરો સળગાવી ન્યુસન્સ ફેલાવવામાં આવતો હોવાથી તેઓની સામે પણ દંડનીય કાર્યવાહી કરવામાં આવી હતી.
ગઇકાલે ગુરૂવારે કમિશનર દ્વારા કાળાનાળા ચોકમાં મિઠાઇ અને ફરસાણની પેઢીઓમાં પ્લાસ્ટીક સંદર્ભે ડ્રાઇવ કરાયા બાદ શહેરના મેડિકલ સ્ટોર્સ ધારકો દ્વારા પ્રતિબંધિત પ્લાસ્ટીકનો ઉપયોગ થતો હોવાનું ધ્યાને આવતા સોલિડ વેસ્ટ મેનેજમેન્ટ વિભાગને કાર્યવાહી માટે સુચના આપી હતી. આથી તંત્ર દ્વારા શહેરમાં ૧૧૭ મેડિકલ સ્ટોરમાં તપાસ કરાતા ૧૯ મેડિકલ સ્ટોરમાંથી પ્રતિબંધિત પ્લાસ્ટીકનો ૧૨ કિલોનો જથ્થો મળી આવતા જપ્ત લઇ રૂા.૧૪,૨૫૦નો કુલ દંડ વસુલવામાં આવ્યો હતો.
