ફુટપાથ પર રહેનારા લોકો પણ માનવી છે; બળજબરીથી હટાવી ન શકાય: હાઈકોર્ટ

મુંબઈ:
દક્ષિણ મુંબઈમાં ફુટપાથ પર રહેતા ઘરવિહોણા લોકોને હટાવવાનો આદેશ આપવાનો ઈન્કાર કરતાં બોમ્બે હાઈકોર્ટે જણાવ્યું હતું કે, બેઘરતા એક વૈશ્વિક સમસ્યા છે અને ફુટપાથ પર રહેતા લોકો પણ અન્ય લોકો જેવા માણસો છે. ફુટપાથ અને શેરીઓનો પર કબજો કરી રહેલા અનઅધિકૃત વિક્રેતાઓ અને હોકર્સના મુદ્દા પર પરની એક અરજીની જસ્ટીસ ગૌતમ પટેલ અને નીલા ગૌખલેએ સુઓ મોટો સુનાવણી કરી હતી.
બોમ્બે બાર એસોસીએશનને દાખલ કરેલી અરજીમાં જણાવવામાં આવ્યું હતું કે, દક્ષિણ મુંબઈમાં ફાઉન્ટેન વિસ્તારની નજીક ફુટપાથ અને શેરીઓમાં ઘણા લોકો રહે છે અને સૂવે છે. આવા લોકો સામે પગલાં લેવા માટે શહેર પોલીસ અને બૃહ મુંબઈ મ્યુનીસીપલ કોર્પોરેશનને પણ પત્રો લખવામાં આવ્યા છે. આવા કેસમાં શું ન્યાયિક આદેશ આપી શકાય તેવા સવાલ કરતાં કોર્ટે જણાવ્યું હતું કે, ‘શું તમે કહો છો કે શહેરને ગરીબોથી મુક્તિ મળવી જોઈએ? આ તે વ્યક્તિઓ છે જેઓ અન્ય શહેરોમાંથી અહીં તકો શોધી રહ્યા છે. બેઘર વ્યક્તિઓનો મુદ્દો વૈશ્વિક છે.
જસ્ટીસ પટેલે કહ્યું હતું કે, તેઓ (બેઘર વ્યક્તિઓ) પણ માણસો છે. તેઓ ગરીબ અથવા ઓછા ભાગ્યશાળી હોઈ શકે છે, પરંતુ તેઓ પણ મનુષ્ય છે. તેઓ કોર્ટ સમક્ષ બીજા તમામ લોકોની સમકક્ષ છે. એસોસીએશનના વકીલ મિલિંદ સાઠેએ સૂચન કર્યું કે, ફુટપાથ પર કબજો કરતા આવા વ્યક્તિઓ માટે નાઈટ શેલ્ટર ઉપલબ્ધ કરાવવામાં આવે. આ પછી બેન્ચે કહ્યું કે, તે એક ઉકેલ છે જે સતાવાળાઓ વિચારી શકે છે. વ્યંગાત્મક ટિપ્પણીમાં કોર્ટે જણાવ્યું હતું કે, આવા પડકારોનો બીએમસીનો સૌથી સરળ ઉકેલ સ્થળ પર બાંધકામ શરુ કરવાનો અથવા મેટ્રો સ્ટેશન બનાવવાનો છે.
જસ્ટીસ પટેલે કટાક્ષ કર્યો હતો કે, ‘ખોદવાનું શરૂ કરો અને બધા લોકો ચાલ્યા જશે. આ પછી કોઈ ફુટપાથનો ઉપયોગ નહીં કરે. કોઈ રાહદારી તેના પર ચાલી શકશે નહીં… કોઈ કાર ત્યાં ચલાવી શકશે નહીં… કોઈ તેના પર રહી શકશે નહીં. સમસ્યા હલ થઈ જશે. આ પછી વર્ષો સુધી બાંધકામ ચાલુ રહેશે. આ એક આદર્શ ઉકેલ છે.’