ભાવનગર, તા.૪
ભાવનગર શહેર અને જિલ્લામાં આ વખતે ઉનાળાની સિઝન વહેલા શરૂ થઈ ગઈ હોય તેમ ફેબ્રુઆરી માસના અંતમાં જ ગરમીનું પ્રમાણ વધવા પામ્યું હતું અને તાપમાનનો પારો 35 ડિગ્રીથી ઉપર પહોંચી જવા પામ્યો છે. ભાવનગર શહેરમાં એક જ દિવસમાં બે ડિગ્રીના વધારા સાથે મહત્તમ તાપમાનનો પારો ૩૭ ડિગ્રીએ પહોંચી જવા પામ્યો હતો. જેના કારણે આકરી ગરમીનો અનુભવ લોકોએ કર્યો હતો. ભાવનગરમાં આઠ મહિના પછી એટલે કે 248 દિવસ પછી ફરીથી તાપમાનનો પારો 37 ડિગ્રીએ પહોંચી જવા પામ્યો છે. જોકે હવામાન વિભાગે કરેલી માવઠાની આગાહીના પગલે બપોર બાદ વાતાવરણમાં આંશિક રાહત થવા પામી હતી અને રાત્રિના તાપમાનમાં ઉલટી ચાલ હોય તેમ બે ડિગ્રીનો ઘટાડો થવા પામ્યો હતો ગતરાત્રિના ભાવનગરમાં લઘુત્તમ તાપમાન 18.6 ડીગ્રી નોંધાયું હતું.
સમગ્ર સૌરાષ્ટ્રની સાથોસાથ ભાવનગર શહેર અને જિલ્લામાં શિયાળામાં કાતિલ ઠંડી પડી હતી અને અનેક વર્ષોનો રેકોર્ડ થવા પામ્યા હતા. તેવી જ રીતે હવે ઉનાળાનો પ્રારંભ પણ જોરદાર ગરમી સાથે થઈ રહ્યો છે આ વખતે ઉનાળાનો પ્રારંભ હોળી પૂર્વેજ થઈ ગયો હોય તેમ તાપમાન ઊંચકાઈ રહ્યું છે. સૌરાષ્ટ્રના ભાવનગર સહિત મોટાભાગના શહેરોનું તાપમાન 37 થી 39 ડિગ્રી સુધી પહોંચી જવા પામ્યુ છે. જેના કારણે આંકરો તાપ પડવા લાગ્યો છે. ભાવનગર શહેરની વાત કરીએ તો હોળી પૂર્વે એટલે કે માર્ચ માસના આરંભ સાથે જ તાપમાનનો પારો ૩૭ ડિગ્રીએ પહોંચી જવા પામેલ છે છેલ્લે 29 જૂન 2022ના રોજ મહત્તમ તાપમાન 37.4 ડિગ્રી નોંધાયુ હતુ ત્યારબાદ આજે 248 દિવસ પછી મહત્તમ તાપમાન 37 ડિગ્રીએ પહોંચી જવા પામ્યુ છે. ત્યારે હજુ ઉનાળો શરૂ થયો છે ત્યાં તાપમાન 37 ડિગ્રી થઈ ગયું તો આગામી દિવસોમાં ક્યાં પહોંચશે તેની કલ્પના કરવી રહી.
દરમિયાન હવામાન વિભાગ દ્વારા ભાવનગર સહિત સૌરાષ્ટ્રના અનેક જિલ્લાઓમાં આગામી દિવસોમાં માવઠાની આગાહી કરવામાં આવી છે તેના પગલે રાજકોટ સહિત અનેક શહેરોમાં વાતાવરણમાં પલટો આવ્યો હતો જેમાં ભાવનગરમાં પણ ગઈકાલે મોડી સાંજથી વાતાવરણમાં આંશિક ફેરફારો થયા હતા જેના કારણે રાત્રિના સમયે તાપમાનમાં બે ડિગ્રીનો ઘટાડો થવા પામ્યો હતો ભાવનગરમાં ભેજનું પ્રમાણ 47% રહેવા સાથે સરેરાશ 6 km ઝડપે પવન ફૂંકાયો હતો.
