વિરોધ પ્રદર્શનની મંજૂરીના નિયમને લઈને ગુજરાત હાઇકોર્ટમાં કરાયેલી એક અરજી પર સુનાવણી યોજાઈ હતી. જેમાં હાઇકોર્ટે કહ્યું હતું કે, દેખાવો કે રેલીની મંજૂરીના નિયમો જાણવાનો નાગરિકોને અધિકાર છે. વિરોધની મંજૂરી કેમ નથી મળતી તે નિયમો જાણવાનો પણ અધિકાર છે. આ સાથે સુનાવણી દરમિયાન હાઈકોર્ટે દેખાવો કે રેલીની મંજૂરીના નિયમો વેબપોર્ટલ પર મુકવાનો નિર્દેશ કર્યો હતો.
એક યુવતીએ CAAના કાયદા સામે દેખાવો કરવા પોલીસ પાસે મંજૂરી માગી હતી, પરંતુ પોલીસ કમિશનરે યુવતીની આ અરજી ફગાવી દીધી હતી. જોકે, તેણીની અરજી ક્યા કારણોસર ફગાવવામાં આવી તે અંગે પોલીસે કંઈ જણાવ્યું નહોતું. આથી આ યુવતીએ RTI કરીને વિગતો માંગી હતી. તેમ છતાં પોલીસે આ અરજી પર જવાબ આપવાનો ઇનકાર કર્યો હતો. અંતે યુવતી સમગ્ર મામલે ગુજરાત હાઈકોર્ટમાં પહોંચી હતી. તેણીએ આ અંગે હાઈકોર્ટમાં એક અરજી કરી હતી. જેમાં તેણીએ રજૂઆત કરી હતી કે, સામાન્ય નાગરિકોને દેખાવો કે રેલી માટે મંજૂરી લેવાના નિયમો પોલીસે વેબ પોર્ટલ પર મૂકવા જોઈએ. સાથે હાઈકોર્ટે પોલીસ કમિશનરને આદેશ કર્યો હતો કે, સામાન્ય માણસને કાયદાઓ અને નિયમો અંગે માહિતી મળી રહે તે હેતુથી પોલીસે એક મહિનામાં આ અંગેના નિયમો વેબ પોર્ટલ પર મૂકવાનાં રહેશે.
નિયમો જાણવાનો નાગરિકોને અધિકારઃ હાઈકોર્ટ
જેથી યુવતીની અરજી પર સુનાવણી દરમિયાન હાઈકોર્ટે મહત્વપૂર્ણ ટિપ્પણી કરી હતી. જેમાં કહેવામાં આવ્યું હતું કે, વિરોધ પ્રદર્શન હેઠળના નિયમો જાણવાનો નાગરિકોને અધિકાર છે. વિરોધની કેમ મંજૂરી નથી મળતી તે નિયમો જાણવાનો અધિકાર છે. RTI અંગે કોર્ટે જણાવ્યું હતું કે, માહિતી અધિકારના કાયદાને પોલીસ હાંસિયામાં ધકેલી ન શકે.
