નવી દિલ્હીઃ વુમન્સ પ્રીમિયર લીગ 2023 મેચમાં દિલ્હી કેપિટલ્સ ટીમે ગુજરાત જાયન્ટ્સ સામે 10 વિકેટથી મોટી જીત નોંધાવી હતી. મેચનો હીરો દક્ષિણ આફ્રિકાની ફાસ્ટ બોલર મારિજન કૈપ હતી, જેણે પાંચ વિકેટ ઝડપી હતી. મારિજને પોતાની ચાર ઓવરમાં માત્ર 15 રન આપ્યા હતા. બાદમાં ઓપનિંગ બેટર શેફાલી વર્માએ તોફાની બેટિંગ કરતા 28 બોલમાં અણનમ 76 રન ફટકારીને દિલ્હીની જીત સુનિશ્ચિત કરી હતી. દિલ્હીએ 77 બોલ બાકી રહેતા મેચ જીતી લીધી હતી.
દિલ્હી કેપિટલ્સે ગુજરાત જાયન્ટ્સની ઇનિંગ્સને નવ વિકેટે 105 રન પર રોકીને માત્ર 7.1 ઓવરમાં જ એક વિકેટ ગુમાવ્યા વિના લક્ષ્ય હાંસલ કરી લીધું હતું. ચાર મેચમાં દિલ્હીની આ ત્રીજી જીત છે જ્યારે ગુજરાતની આટલી મેચમાં ત્રીજી હાર છે. શેફાલીએ કેપ્ટન મેગ લેનિંગ (15 બોલમાં અણનમ 21) સાથે 43 બોલમાં 107 રનની અણનમ 28 બોલની ઇનિંગ્સમાં 10 ચોગ્ગા અને પાંચ છગ્ગાની મદદથી 107 રનની અતૂટ ભાગીદારી કરી હતી.
મેન ઓફ ધ મેચ કૈપે ચાર ઓવરમાં 15 રન આપીને પાંચ વિકેટ ઝડપી હતી, જે આ સિઝનમાં અત્યાર સુધીની શ્રેષ્ઠ બોલિંગ ફિગર છે. કૈપને ભારતીય ફાસ્ટ બોલર શિખા પાંડેનો સારો સાથ મળ્યો, જેણે 26 રનમાં ત્રણ વિકેટ લીધી હતી. લેફ્ટ આર્મ સ્પિનર રાધા યાદવે 19 રન આપીને સફળતા હાંસલ કરી હતી.
ગુજરાત જાયન્ટ્સ તરફથી કિમ ગાર્થે સૌથી વધુ અણનમ 32 રનનું યોગદાન આપ્યું હતું. 37 બોલની ઇનિંગ્સમાં ત્રણ ચોગ્ગા સાથે તેણે સાતમી વિકેટ માટે જ્યોર્જિયા વેરહામ (22) સાથે 33 રન અને આઠમી વિકેટ માટે તનુજા કંવર (13) સાથે 31 રનની મહત્વપૂર્ણ ભાગીદારી કરી હતી.
ટાર્ગેટનો પીછો કરતા શેફાલીએ બીજી ઓવરમાં તનુજા સામે સિક્સર અને ફોર ફટકારીને પોતાનો ઈરાદો બતાવ્યો હતો. તેણે ત્રીજી ઓવરમાં ગાર્થ સામે હેટ્રિક ફોર ફટકારી હતી.
ગાર્ડનર જેવી અનુભવી બોલર પણ શેફાલીની આક્રમક ઈનિંગ્સ સામે ચાલી શકી નહોતી. તેણે આ બોલર સામે સતત બે ચોગ્ગા ફટકાર્યા બાદ ચોથી ઓવરમાં એક જોરદાર સિક્સર ફટકારી. આ જ ઓવરમાં લેનિંગે પણ સતત બે ચોગ્ગા ફટકાર્યા, જેના કારણે ટીમનો સ્કોર ચાર ઓવરમાં 57 રન થઈ ગયો હતો.
શેફાલીએ પાંચમી ઓવરમાં માનસી વર્મા સામે બે ચોગ્ગા ફટકાર્યા બાદ એક રન લઈને 19 બોલમાં પોતાની અડધી સદી પૂરી કરી હતી. આ ટૂર્નામેન્ટની આ બીજી સૌથી ઝડપી અડધી સદી છે. તેણે પાવરપ્લેની છેલ્લી ઓવરમાં તનુજા સામે સતત બે સિક્સર ફટકારી, જેનાથી ટીમને 87 રન બનાવવામાં મદદ મળી, તેણે પાવરપ્લેમાં ટુર્નામેન્ટનો રેકોર્ડ બનાવ્યો.
