આ વર્ષે ભારતમાંથી કપાસની નિકાસ ઐતિહાસિક સ્તરે નીચી રહેશે

આંતરરાષ્ટ્રીય બજારમાં કપાસનું વેચાણ કરતા વૈશ્વિક સ્તરે ત્રણ મોટા દેશોમાં ભારતનો સમાવેશ થાય છે. આ વર્ષે ભારતમાંથી કપાસની નિકાસ ઐતિહાસિક સ્તરે નીચી રહેશે. ગુજકોટ ટ્રેડ એસોસિએશનના સેક્રેટરી અજય દલાલ કહે છે કે “આ વર્ષે ભારતમાંથી માત્ર 30 લાખ ગાંસડીથી ઓછી નિકાસ થવાની શક્યતા છે. ગયા વર્ષે ભારતમાંથી 42.50 લાખ ગાંસડીની નિકાસ કરવામાં આવી હતી.
ગુજરાત સહિત ભારતમાં ખેડૂતોએ હજુ સુધી કપાસનું સંપૂર્ણ વેચાણ કર્યું નથી. ખેડૂતોએ ઉંચા ભાવની આશાએ ખેતર અથવા ઘરમાં કપાસનો સંગ્રહ કર્યો છે. ઉપરાંત વૈશ્વિક માંગના અભાવે નિકાસ પણ ઓછી રહી છે.”
અમેરિકા પણ કપાસનો મોટો નિકાસકાર છે. આ વર્ષે ભારતીય કપાસના ભાવ અમેરિકા કરતા વધુ છે. કોટન એસોસિએશન ઓફ ઈન્ડિયાના સભ્ય સંદીપ જૈન કહે છે કે “ફેબ્રુઆરી સુધી ભારતમાંથી માત્ર 10 લાખ ગાંસડી કપાસની નિકાસ થઈ છે. રશિયા યુક્રેન યુદ્ધ અને મોંઘવારીને કારણે કપાસની માંગમાં ઘટાડો થયો છે.” ભારતમાં કપાસની એક કેન્ડી (356 કિગ્રા) ની કિંમત 60 હજાર રૂપિયા છે. અમેરિકન કોટનની કિંમત પ્રતિ કેન્ડી 52,000 રૂપિયા છે.