જામનગર જિલ્લાના જામજોધપુરના માર્કેટિંગ યાર્ડના દ્વારે આજે બપોરે ધોળે દહાડે લૂંટની ઘટના બનતાં ભારે સનસનાટી મચી ગઈ છે. ડબલ સવારી બાઈકમાં આવેલા લૂંટારૂઓ ૨૦ લાખની રકમ ભરેલા થેલાને લૂંટ ચલાવી ભાગી છૂટ્યા છે. પોલીસ દ્વારા લૂંટારૂઓને પકડવા માટે સમગ્ર જિલ્લા ભરમાં નાકાબંધી કરવામાં આવી છે.
આ લૂંટના બનાવની વિગત એવી છે કે જામજોધપુરમાં રહેતા ભૌતિક ભાઈ રામોલિયા નામના વેપારી, કે જેઓ જામજોધપુર માર્કેટિંગ યાર્ડમાં પોતાના પાર્ટનર મનસુખભાઈ હિંગળાજિયા સાથે વેપાર કરે છે. તેઓ આજે બપોરે ૧૨.૧૫ વાગ્યાના અરસામાં બેંકમાંથી રૂપિયા ૨૦ લાખની રોકડ રકમ ઉપાડીને બાઇક પર બેસીને માર્કેટિંગ યાર્ડમાં જઈ રહ્યા હતા, જે દરમિયાન ડબલ સવારી બાઈકમાં આવેલા બે લુટારુઓ કે જેઓ અગાઉથી પીછો કરી રહ્યા હોય તેમણે મોકાનો લાભ લઈને વેપારીના હાથમાંથી રૂપિયા ૨૦ લાખની રોકડ ભરેલા થેલાની લૂંટ ચલાવી હતી, અને ભાગી છૂટ્યા હતા.
ધોળે દહાડે બનેલા લૂંટના બનાવને લઈને ભારે હડકંપ મચી ગયો છે. અને વેપારી દ્વારા ભારે બુમાબુમ કરવામાં આવી હતી, પરંતુ બંને લૂંટારુઓ ભાગી છૂટવામાં સફળ થયા હતા. સમગ્ર મામલાની પોલીસને જાણ કરતા જામજોધપુરનો પોલીસ કાફલો તુરંત જ હરકતમાં આવ્યો હતો.જ્યારે જિલ્લા પોલીસ વડા સુધી આ મેસેજ પહોંચ્યો હોવાથી જિલ્લાભરમાં નાકાબંધી કરવામાં આવી હતી, અને સમગ્ર જિલ્લાની બોર્ડરને સીલ કરી દેવામાં આવી છે, અને બારીકાઈ થી લૂંટારુઓનું નિરીક્ષણ કરવામાં આવી રહ્યું છે.
પોલીસ દ્વારા માર્કેટિંગ યાર્ડની બહાર લગાવેલા સીસીટીવી કેમેરાની મદદથી લૂંટારુઓને પકડવા માટેની કવાયત હાથ ધરી છે, જેમાં બે લૂંટારુઓ બાઈકમાં રોકડ રકમ ભરેલો થેલો ઝુંટવીને ભાગી રહેલા જોવા મળ્યા હતા. તેના વર્ણનના આધારે તપાસનો દોર આગળ ધપાવવામાં આવી રહ્યો છે.
