ફરી નાગૌરનું મામેરું ઇતિહાસના પાના પર સુવર્ણ અક્ષરોમાં લખાયું છે. નાગૌરના 6 ભાઇઓએ અહીંના મામેરાને ફરી ચર્ચાનો વિષય બનાવ્યો છે. દૂધના વેપારીઓએ તેમની સૌથી નાની બહેનને ત્યાં 8 કરોડ રૂપિયાનું મામેરું ભર્યું છે. બહેનના ઘરે ભાઇઓ બળદગાડું લઇને પહોંચ્યા તો એક તબક્કે તો લોકો હસવા લાગ્યા હતા પણ પાછળ આવી રહેલો એક હજાર કારનો કાફલો અને દેશી ઘી તથા ખાંડથી ભરેલી ટ્રેક્ટર ટ્રોલી જોઇને આખું ગામ ચોંકી ગયું. નાગૌર જિલ્લાના ઢિગસરાના રહેવાસી ભાગીરથ રામ મેહરિયા (ભાજપ નેતા) અને તેમના પાંચ ભાઇઓએ રાયધનુના ગોદારા પરિવારમાં તેમની બહેન ભંવરીદેવીના ઘરે લગ્નપ્રસંગમાં ભરેલું આ મામેરું ભારે ચર્ચામાં છે. 6 ભાઇઓ ભંવરીદેવીને ત્યાં નાગૌરી નસલના બળદોની જોડ લઇને પહોંચ્યા હતા, જેની પાછળ ધાન, ખાંડ, દેશી ઘી તથા બીજું અનાજ ભરેલી ટ્રેક્ટર ટ્રોલી અને તેની પાછળ એક હજાર કારનો અંદાજે બે કિ.મી. લાંબો કાફલો હતો.
બહેન ભંવરીના માથે ચુંદડી ઓઢાડી ભાઇઓએ મામેરું ભરવાનું શરૂ કર્યું. મામેરામાં 100 વીઘા જમીન, નેશનલ હાઇવે પર એક વીઘાનો પ્લોટ, નવા ટ્રેક્ટર ટ્રોલી, ગોળનો રવો, દેશી ઘી ભરેલો ઘડો, સવા કિલો સોનું, 14 કિલો 250 ગ્રામ ચાંદી, 2.21 કરોડ રૂપિયા રોકડા તથા બહેનની સાસરીમાં એટલે કે રાયધનુ ગામમાં દરેક ઘરને એક-એક ચાંદીનો સિક્કો અને ધાબળો વહેંચ્યા હતા.
