ભાવનગરના હાઇકોર્ટ રોડ પાસે આવેલ ડબગર વાળી શેરીમાં મહાદેવ ટ્રેડર્સ નામની દુકાનમાં મોબાઇલમાં આઈ.ડી. દ્વારા ક્રિકેટ મેચના સોદા કરી હારજીતનો જુગાર રમાડતા શખ્સને એલ.સી.બી. અને પેરોલ ફર્લો સ્ક્વોડે ઝડપી લઇ રોકડ રકમ અને મોબાઇલ મળી રૂ. ૧.૩૩ લાખનો મુદ્દામાલ કબજે કરી કાયદેસર કાર્યવાહી હાથ ધરી હતી.
આ અંગે પ્રાપ્ત વિગત મુજબ પેરોલ ફર્લો સ્કોડના સ્ટાફને બાતમી મળી હતી કે, ગાયત્રીનગર આકાશગંગા ફ્લેટમાં રહેતા ગોપાલ ઉર્ફે અન્ના કનૈયાલાલ બાલાણી હાઇકોર્ટ રોડ પાસે આવેલ ડબગર વાળી શેરી, ઓમ આર્કેડમાં પહેલા માળે આવેલ પોતાની મહાદેવ ટ્રેડર્સ નામની દુકાનમાં મોબાઇલમાં આઈ.ડી. દ્વારા ક્રિકેટ મેચના સોદા કરી આર્થિક લાભ સારું હાર જીતનો જુગાર રમી રમાડી તેના લેતી દેતીના હિસાબો કરી જુગારનો અખાડો ચલાવે છે. જે બાતમીના આધારે એલ.સી.બી. તથા પેરોલ ફર્લો સ્ક્વોડે ડબગર વાળી શેરીમાં આવેલ મહાદેવ ટ્રેડ નામની દુકાનમાં દરોડો પાડી ઓનલાઇન માસ્ટર આઇ.ડી. ક્લાઈન્ટને આપી હાલમાં ચાલી રહેલ આઈ.પી.એલ. ક્રિકેટ મેચમાં સોદા કરી જુગાર રમાડતા અતુલ દિનેશભાઈ જોશી ( રહે. નંદવિલા બંગલો,ટોપ થ્રી સર્કલ ) ને ઝડપી લઇ રોકડા રૂ. ૧,૨૩,૩૦૦ તેમજ ૦૨ મોબાઈલ મળી કુલ રૂ.૧,૩૩,૮૦૦ નો મુદ્દામાલ કબજે કર્યો હતો.
પોલીસ પૂછપરછમાં ઝડપાયેલા શખ્સે તેના શેઠ ગોપાલ ઉર્ફે અન્ના કનૈયાલાલ બાલાણી એ ઓનલાઇન માસ્ટર આઇ.ડી. આપી જે ગ્રાહકોને મોકલી હાલમાં ચાલતી આઈપીએલ મેચમાં ગ્રાહકો પાસે હારજીતનો જુગાર રમાડતા હોવાનું જણાવતા પોલીસે બંને ઇસમો વિરુદ્ધ ગુનો નોંધી કાયદેસર કાર્યવાહી હાથ ધરી હતી.
