આઈપીએલની 16મી સીઝન અત્યાર સુધીની તમામ સીઝનમાંથી ઘણી રોમાંચક સાબિત થઈ છે. 55 મેચ પૂરી થયા બાદ પણ હજુ સુધી કોઈ ટીમ પ્લેઓફ માટે ક્વોલિફાય થઈ શકી નથી. 10 મેના રોજ, ચેન્નાઈ સુપર કિંગ્સ અને દિલ્હી કેપિટલ્સ વચ્ચે ચેપોક સ્ટેડિયમમાં મેચ રમાઈ હતી. આ મેચમાં 27 રનની જીત સાથે ચેન્નાઈએ પ્લેઓફમાં પોતાનું સ્થાન લગભગ નિશ્ચિત કરી લીધું છે.
આ સિઝનમાં 12 મેચોમાં ચેન્નાઈ સુપર કિંગ્સની આ 7મી જીત હતી અને હવે તે 15 પોઈન્ટ સાથે પોઈન્ટ ટેબલમાં બીજા સ્થાને છે. અત્યારે ડિફેન્ડિંગ ચેમ્પિયન ગુજરાત ટાઇટન્સ 16 પોઈન્ટ સાથે પોઈન્ટ ટેબલમાં નંબર વન પર છે. ચેન્નાઈ સામે દિલ્હી કેપિટલ્સની હાર બાદ તેમની પ્લેઓફમાં પહોંચવાની આશા લગભગ સમાપ્ત થઈ ગઈ છે.
દિલ્હી કેપિટલ્સ પાસે હવે 11 મેચ બાદ 8 પોઈન્ટ છે અને તે પોઈન્ટ ટેબલમાં સૌથી નીચે છે. દિલ્હીએ હજુ 3 મેચ રમવાની છે અને તે તમામ જીતવા છતાં પ્લેઓફમાં તેનું સ્થાન નિશ્ચિત ગણી શકાય નહીં.
પોઈન્ટ ટેબલમાં હાલ 4 ટીમો 10 પોઈન્ટ પર છે
55 મેચ પુરી થયા બાદ પોઈન્ટ ટેબલમાં 11-11 મેચ બાદ 4 ટીમો 10 પોઈન્ટ પર છે. આવી સ્થિતિમાં, પ્લેઓફમાં પહોંચવાના દૃષ્ટિકોણથી તમામ ટીમો માટે કેટલીક આગામી મેચો ખૂબ જ મહત્વપૂર્ણ માનવામાં આવી શકે છે. હાલમાં, પોઈન્ટ ટેબલમાં, મુંબઈ ઈન્ડિયન્સ 12 પોઈન્ટ સાથે ત્રીજા સ્થાને છે જ્યારે લખનૌ સુપર જાયન્ટ્સ 11 પોઈન્ટ સાથે ચોથા સ્થાને છે.
ગત સિઝનની ફાઈનલમાં પહોંચેલી રાજસ્થાન રોયલ્સ હાલમાં 10 પોઈન્ટ સાથે 5માં સ્થાને છે. આ પછી પોઈન્ટ ટેબલમાં કોલકાતા નાઈટ રાઈડર્સ, રોયલ ચેલેન્જર્સ બેંગ્લોર અને પંજાબ કિંગ્સની ટીમો છે. સનરાઇઝર્સ હૈદરાબાદ પણ 10 મેચમાં 4 જીત બાદ પ્લેઓફની રેસમાં યથાવત છે.
પર્પલ કેપની રેસમાં મોહમ્મદ સિરાજ પાછળ
RCBનો સ્ટાર ફાસ્ટ બોલર મોહમ્મદ સિરાજ છેલ્લી કેટલીક મેચોમાં સૌથી વધુ વિકેટ લઈને પર્પલ કેપની રેસમાં આગળ હતો, પરંતુ હવે તે ઘણો પાછળ રહી ગયો છે. હાલમાં ગુજરાતનો ફાસ્ટ બોલર મોહમ્મદ શમી 19 વિકેટ સાથે પ્રથમ અને ગુજરાતનો જ સ્પિનર રાશિદ ખાન 19 વિકેટ સાથે બીજા ક્રમે છે. ચેન્નાઈના તુષાર દેશપાંડેએ પણ ટોપ-5માં 19 વિકેટ લીધી છે અને તે ત્રીજા નંબર પર છે. આ સિવાય મુંબઈનો પિયુષ ચાવલા 17 વિકેટ સાથે ચોથા અને કોલકાતાનો વરુણ ચક્રવર્તી 17 વિકેટ સાથે પાંચમા ક્રમે છે.
