વર્લ્ડ કપ 2023 માટે ક્વોલિફાયર મેચો રમાઈ રહી છે. ઝિમ્બાબ્વેની યજમાનીમાં રમાઈ રહેલી ક્વોલિફાયરની પ્રથમ મેચ નેપાળ અને ઝિમ્બાબ્વે વચ્ચે રમાઈ હતી, જેમાં ઝિમ્બાબ્વેનો 8 વિકેટે વિજય થયો હતો. આ જીત સાથે ઝિમ્બાબ્વેના બેટ્સમેન સીન વિલિયમ્સે એક મોટો રેકોર્ડ પોતાના નામે કરી લીધો. વાસ્તવમાં સીન વિલિયમ્સ ઝિમ્બાબ્વે માટે વન-ડેમાં સૌથી ઝડપી સદી ફટકારનાર બેટ્સમેન બન્યો હતો.
291 રનનો પીછો કરતા ઝિમ્બાબ્વેની ટીમે સરળતાથી 8 વિકેટે મેચ જીતી લીધી હતી. ટીમ માટે કેપ્ટન ક્રેગ એર્વિન અને સીન વિલિયમ્સે શાનદાર સદીની ઇનિંગ્સ રમી હતી. કેપ્ટન એરવિને 15 ચોગ્ગા અને 1 છગ્ગાની મદદથી અણનમ 121 રન બનાવ્યા, જ્યારે સીન વિલિયમ્સે 70 બોલમાં 13 ચોગ્ગા અને 1 છગ્ગાની મદદથી અણનમ 102 રન બનાવ્યા હતા.
આ સદી સાથે સીન વિલિયમ્સે ઝિમ્બાબ્વે માટે વનડેમાં સૌથી ઝડપી સદી ફટકારવાનો રેકોર્ડ પણ પોતાના નામે કર્યો છે. આ પહેલા ઝિમ્બાબ્વે તરફથી વનડેમાં સૌથી ઝડપી સદી ફટકારવાનો રેકોર્ડ રેગિસ ચકાબ્વાના નામે હતો. ચકબ્વાએ ઓગસ્ટ 2022માં બાંગ્લાદેશ સામે રમાયેલી ODI મેચમાં 73 બોલમાં સદી પૂરી કરી હતી. હવે આ રેકોર્ડ સીન વિલિયમ્સે પોતાના નામે કરી લીધો છે.
મેચમાં ઝિમ્બાબ્વેએ ટોસ જીતીને પ્રથમ બોલિંગ કરવાનો નિર્ણય કર્યો હતો. નેપાળની ટીમ બેટિંગ કરવા ઉતરી અને 50 ઓવરમાં 8 વિકેટે 290 રન બનાવ્યા. ટીમ માટે ઓપનર કુશલ ભુર્તેલે 95 બોલમાં 13 ચોગ્ગા અને 2 છગ્ગાની મદદથી 99 રનની ઇનિંગ રમી હતી. આ સિવાય વિકેટ કીપર બેટ્સમેન આસિફ શેખે 100 બોલમાં 7 ફોરની મદદથી 66 રન બનાવ્યા હતા.
રનનો પીછો કરવા ઉતરેલી ઝિમ્બાબ્વેની ટીમે 44.1 ઓવરમાં માત્ર 2 વિકેટ ગુમાવીને લક્ષ્ય હાંસલ કરી લીધું હતું. ટીમ તરફથી કેપ્ટન ક્રેગ એરવિને 121* અને સીન વિલિયમ્સની 102* ઈનિંગ્સ રમીને ટીમને જીત અપાવવામાં મહત્વની ભૂમિકા ભજવી હતી.
