અમેરિકાની મુલાકાતે પહોંચેલા વડાપ્રધાન નરેન્દ્ર મોદીનું ઉષ્માભેર સ્વાગત કરવામાં આવ્યું છે. વડાપ્રધાન મોદીએ મુલાકાતના પહેલા દિવસે ન્યૂયોર્કમાં શિક્ષાવિદ્દો અને થીંક ટેન્ક સમુહના સભ્યો સાથે મુલાકાત કરી હતી.
PM મોદીને મળ્યા પછી યુએસ ખગોળશાસ્ત્રી, લેખક અને વિજ્ઞાન સંચારકાર નીલ ડી. ગ્રાસ ટાયસને કહ્યું કે તેમની સાથે સમય વીતાવીને હું ખુબ ખુશ છું. ભવિષ્ય માટે તેમના વિઝન વિશે જાણીને આનંદ થયો. મને ખાતરી છે કે ભારત જે હાંસલ કરી શકે છે તેની કોઈ મર્યાદા નથી. તેથી જ મને ભારતનું ખૂબ જ ઉજ્જવળ ભવિષ્ય દેખાય છે. પોતાનો પ્રતિભાવ આપતાં પ્રોફેસર પોલ રોમરે કહ્યું હતું કે તે એક શાનદાર મુલાકાત હતી. અમે શહેરી વિકાસના મહત્વ વિશે વાત કરી હતી. તેઓ આ મુદ્દાઓને ખુબ જ સારી રીતે સમજે છે. વડાપ્રધાને ખુબ જ સારી રીતે સમજાવ્યું કે શહેરીકરણ કોઇ સમસ્યા નથી. આ એક અવસર છે. ભારત આધાર જેવી પહેલથી વિશ્વને રસ્તો ચિંધી શકે છે.
પેન્સિલવેનિયા સ્ટેટ યુનિવર્સિટીના અધ્યક્ષ નીલી બેંદાપુડીએ પણ કહ્યું કે આ એક અવિશ્વસનીય મુલાકાત હતી. વડાપ્રધાન સાથે બેસવું અને તેમના દ્રષ્ટિકોણને સમજવો કે બે મહાન લોકશાહી ભારત અને યુએસએ એક સાથે કેવી રીતે કામ કરી શકે છે, વાસ્તવમાં તે ખુબ જ પ્રેરણાદાયક છે. ન્યૂયોર્કમાં પીએમ મોદીને મળ્યા બાદ યુએસ રોકાણકાર રે ડાલિયોએ કહ્યું કે ભારતની ક્ષમતા વિશાળ છે અને હવે તમારી પાસે એક સુધારક છે જેની પાસે પરિવર્તન લાવવાની ક્ષમતા અને લોકપ્રિયતા છે. ભારત અને પીએમ મોદી એવા સંક્રમણ બિંદુ પર છે જે ઘણી તકો ઉભી કરશે.
તેમને મળીને ખુબ જ સારુ લાગ્યું- ફાલ્ગુની શાહ
ગ્રેમી એવોર્ડ વિજેતા ભારતીય-અમેરિકન ગાયિકા ફાલ્ગુની શાહે ન્યૂયોર્કમાં પીએમ મોદીને મળ્યા પછી કહ્યું કે તેમને મળીને ખુબ જ સારુ લાગ્યું. તેમને આલ્બમ કવર અને ગીત ખુબ જ પસંદ આવ્યું. તેમણે કહ્યું કે ગીતથી ઘણા લોકોને ફાયદો થશે.
