રાજધાની દિલ્હીમાં ‘મોદી સરકારના 9 વર્ષ’ વિષય પર એક કોન્ફરન્સને સંબોધતા ગડકરીએ એમ પણ કહ્યું કે ભારત કુલ 64 લાખ કિ.મી.નું રોડ નેટવર્ક ધરાવે છે, જે અમેરિકા બાદ વિશ્વમાં બીજું સૌથી મોટું રોડ નેટવર્ક છે. દેશમાં હાલ કુલ 1,45,240 કિ.મી.નું નેશનલ હાઇવે નેટવર્ક છે, જે 2013-14માં 91,287 કિ.મી. હતું. નરેન્દ્ર મોદી સરકાર દ્વારા છેલ્લા 9 વર્ષ દરમિયાન કરાયેલા વિકાસકાર્યોના ભાગરૂપે ભારતનું રોડ નેટવર્ક 59 ટકા વૃદ્ધિ સાથે વિશ્વનું બીજું સૌથી મોટું રોડ નેટવર્ક બન્યું હોવાનું કેન્દ્રીય રોડ, ટ્રાન્સપોર્ટ અને હાઇવે મંત્રી નીતિન ગડકરીએ મંગળવારે જણાવ્યું.
ગડકરીએ ઉમેર્યું હતું કે છેલ્લા 9 વર્ષમાં ભારતે રોડ નેટવર્ક ક્ષેત્રે 7 વર્લ્ડ રેકોર્ડ સ્થાપ્યા છે. ટોલ ચાર્જની આવક પણ 2013-14માં 4,770 કરોડ રૂપિયા હતી, જે વધીને 41,342 કરોડ રૂપિયા સુધી પહોંચી છે. 2030 સુધીમાં ટોલ રેવન્યૂ વધારીને 1.30 લાખ કરોડ રૂપિયાની કરવાનું સરકારનું લક્ષ્ય છે. ફાસ્ટેગના ઉપયોગથી ટોલ પ્લાઝાઓ પર વેઇટિંગ ટાઇમ ઘટીને 47 સેકન્ડનો થઇ ગયો છે, જેને હજુ ઘટાડીને 30 સેકન્ડથી નીચે લાવવા સરકાર વિવિધ પગલાં લઇ રહી છે. દેશભરમાં હાઇટેક હાઇવેઝનું નેટવર્ક સતત વિસ્તરી રહ્યું છે. હાઇવે પર અકસ્માતો રોકવા અને બ્લેક સ્પોટ દૂર કરવા રોડ, ટ્રાન્સપોર્ટ અને હાઇવે મંત્રાલય સતત કામ કરી રહ્યું છે.
2014માં દેશમાં રોજ સરેરાશ 11.6 કિ.મી. હાઇવે બનતા હતા જ્યારે હવે રોજ સરેરાશ 41 કિ.મી. હાઇવે બની રહ્યા છે. નવા હાઇવેના નિર્માણમાં વૃક્ષછેદન પણ ઓછામાં ઓછું થાય તેવા પ્રયાસ કરવામાં આવે છે. દેશભરમાં હાઇવે નિર્માણમાં 68 હજાર વૃક્ષો ટ્રાન્સપ્લાન્ટ કરાયા છે જ્યારે 3 કરોડથી વધુ નવા વૃક્ષો વાવવામાં આવ્યા છે.
