ગુજરાતમાં ચોમાસાની શરુઆત સાથે જ મેઘરાજાએ તોફાની બેટિંગ શરુ કરી દીધી છે. 29મી તારીખના સવારના 6 વાગ્યાથી 30મીના સવારના 4 વાગ્યા સુધીમાં સૌથી વધુ જૂનાગઢમાં 10 ઈંચથી વધારે વરસાદ નોંધાયો છે. આ સિવાય સૌરાષ્ટ્રના ગીર સોમનાથ, સુરેન્દ્રનગર, રાજકોટ સહિત દક્ષિણ ગુજરાતના સુરત, તાપી, નર્મદામાં સારા પ્રમાણમાં વરસાદ નોંધાયો છે. રાજ્યના ઉત્તર તથા ઉત્તર પૂર્વના ભાગોમાં પણ ભારે વરસાદ નોંધાયો છે.
સૌરાષ્ટ્ર અને દક્ષિણ ગુજરાતમાં ધમધોકાર વરસાદ પડી રહ્યો છે આવામાં જૂનાગઢ તાલુકામાં પાછલા 22 કલાકમાં સૌથી વધુ 10 ઈંચ વરસાદ ખાબક્યો છે. ગીરનાર પર્વત પરથી તળેટીમાં જળાભિષેક થતો હોય તેવા દ્રશ્યો પણ જોવા મળી રહ્યા છે. આ સિવાય જૂનાગઢમાં ઠેરઠેર ભારે વરસાદના કારણે નદી, નાળા તથા તળાવ સહિતની જગ્યાઓ પર નવા જળ આવ્યા છે.
સુરતના મહુવામાં 7.3 ઈંચ, તાપીના વાલોડમાં 6.8 ઈંચ અને વ્યારામાં 6.4 ઈંચ વરસાદ ખાબક્યો છે. 29મી જૂને રાજ્યના સૌરાષ્ટ્ર તથા દક્ષિણ ગુજરાતમાં ભારે વરસાદ નોંધાયો છે. જેમાં ગીર સોમનાથના તલાલામાં 6.1 ઈંચ અને સુત્રાપાડામાં 6 ઈંચ વરસાદ નોંધાયો છે. જૂનાગઢના મેંદરડામાં 5.9 ઈંચ અને ભેસાણમાં 5.4 ઈંચ વરસાદ થયો છે. સૌરાષ્ટ્રના જિલ્લાઓમાં વાવાઝોડા દરમિયાન ભારે વરસાદ નોંધાયો હતો તે પછી ફરી એકવાર ચોમાસાની શરુઆત સાથે ભારે વરસાદ જામ્યો છે.
સુરેન્દ્રનગરના ચોટીલામાં 5.3 ઈંચ વરસાદ થયો હતો, જૂનાગઢના વિસાવદરમાં 5.3 ઈંચ વરસાદ, રાજકોટના ધોરાજીમાં પણ 5.3 ઈંચ વરસાદ થયો છે. નર્મદાના તિલકવાડામાં 5.1 ઈંચ વરસાદ નોંધાયો છે.
રાજ્યના સૌરાષ્ટ્ર અને દક્ષિણ ગુજરાતમાં ભારેથી અતિભારે વરસાદ થયો છે. જેમાં સુરત, તાપી, નવસારી, ડાંગ, વલસાડમાં ભારેથી અતિભારે વરસાદ નોંધાયો હતો. જ્યારે સાબરકાંઠા, વડોદરા, ડાંગ, મોરબી, ભાવનગર, જામનગરમાં પણ સારા પ્રમાણમાં વરસાદ થયો હતો.
આજે દક્ષિણ ગુજરાતના વલસાડ, નર્મદા, તાપીમાં અતિભારે વરસાદ રહેવાની સંભાવનાઓ છે. જ્યારે કાલ-પહેલી જુલાઈએ ભારે વરસાદની સંભાવનાઓ છે. સૌરાષ્ટ્ર કચ્છ સિવાયના રાજ્યના અન્ય ભાગોમાં કે 2-3 જુલાઈએ ભારે વરસાદની આગાહી નથી, કારણ કે જે વરસાદ આપતી સિસ્ટમ છે તે નબળી પડી જશે.
