પશ્ચિમ બંગાળમાં પંચાયતી ચૂંટણીમાં છરાબાજી, બોમ્બ ધડાકા અને ફાયરિંગ: 5ના મોત

પશ્ચિમ બંગાળમાં આજે પંચાયત ચૂંટણી માટે મતદાન ચાલી રહ્યું છે. પરંતુ આ સાથે અહીંથી હિંસાના સમાચાર આવી રહ્યા છે. છેલ્લા 24 કલાકમાં 5 લોકોના મોત થયા છે. ટીએમસીનો આરોપ છે કે છેલ્લા 24 કલાકમાં આ લોકો છરાબાજી, બોમ્બ ધડાકા અને ફાયરિંગમાં માર્યા ગયા છે. આ હુમલા શુક્રવાર રાતથી આજ સવાર સુધી પ્રકાશમાં આવ્યા છે.
શનિવારે સવારે બેલડાંગામાં ટીએમસી કાર્યકરની ગોળી મારીને હત્યા કરી દેવામાં આવી છે તથા મુર્શિદાબાદમાં ટીએમસી કાર્યકરની શુક્રવારે રાત્રે ચાકુ મારીને હત્યા કરવાનો આરોપ લગાવાયો છે. મુર્શિદાબાદમાં જ શુક્રવારે રાત્રે રેજીનગરમાં બોમ્બ વિસ્ફોટમાં ટીએમસી કાર્યકરનું કથિત મોત થયું છે જ્યારે કૂચબિહારમાં શનિવારે સવારે તુફનગંજમાં ટીએમસી કાર્યકરની ચાકુ મારીને હત્યા કરવાનો આરોપ કરાયો છે. ઉપરાંત માલદામાંટીએમસી નેતાના સંબંધીની હત્યા થઇ છે. માલદાના માણિકચોકમાં ભારે બોમ્બમારો બાદ હત્યા થઇ હોવાનો આરોપ લગાવાયો છે.
પશ્ચિમ બંગાળના હુગલી જિલ્લામાં અપક્ષ ઉમેદવાર જહાનઆરા બેગમના એજન્ટ પર ગોળીબારનો આરોપ છે. આ ઘટના આરામબાગમાં અરંડી ગ્રામ પંચાયત 1 ના બૂથ 273 પર બની હતી. ગોળી મારનાર એજન્ટનું નામ કયામુદ્દીન મલિક છે. બૂથ પર જતી વખતે શાસક પક્ષ પર ફાયરિંગ કરવાનો આરોપ છે. તૃણમૂલ કોંગ્રેસે ટ્વીટ કર્યું, કે આઘાતજનક અને દુ:ખદ ઘટનાઓએ મતદાનને આંચકો આપ્યો છે. રેજીનગર, તુફનગંજ અને ખારગ્રામમાં અમારી પાર્ટીના ત્રણ કાર્યકરો માર્યા ગયા છે અને ડોમકોલમાં બે લોકોને ગોળી વાગી છે. જ્યારે બંગાળ ભાજપ, સીપીઆઈએમ પશ્ચિમ બંગાળ અને બંગાળ કોંગ્રેસ કેન્દ્રીય દળોની તૈનાતીની માંગ કરી રહ્યા છે.