ભારત અને વેસ્ટ ઈન્ડિઝ વચ્ચે પ્રથમ ટેસ્ટ મેચ રમાઈ રહી છે. આ મેચના પહેલા બે દિવસમાં ભારતીય બોલરો અને બેટ્સમેનોએ શાનદાર પ્રદર્શન કર્યું છે. કેપ્ટન રોહિત શર્મા અને યશસ્વી જયસ્વાલે શાનદાર પ્રદર્શન કર્યું અને જ્વલંત સદી ફટકારી. વેસ્ટ ઈન્ડિઝે પ્રથમ દાવમાં 150 રન બનાવ્યા હતા. આ સાથે જ ટીમ ઈન્ડિયાએ અત્યાર સુધી 2 વિકેટના નુકસાન પર 312 રન બનાવી લીધા છે. આ મેચમાં વિરાટ કોહલીએ એક મોટો રેકોર્ડ બનાવ્યો.
રવિ શાસ્ત્રીને કરી દીધા પાછળ
વિરાટ કોહલી હાલમાં વેસ્ટ ઈન્ડિઝ સામેની પ્રથમ ટેસ્ટ મેચમાં 36 રન બનાવીને હજુ રમી રહ્યા છે. તેમણે નાની ઇનિંગ્સ રમીને રવિ શાસ્ત્રીને પાછળ છોડી દીધા છે. કોહલીના હવે વેસ્ટ ઈન્ડિઝ સામેની ટેસ્ટ મેચમાં 858 રન થઈ ગયા છે. ત્યારે શાસ્ત્રીએ વિન્ડીઝ સામે 847 રન બનાવ્યા હતા. વેસ્ટ ઈન્ડિઝ સામે સૌથી વધુ રન બનાવવાનો રેકોર્ડ અનુભવી સુનીલ ગાવસ્કરના નામે છે. તેમણે વિન્ડીઝ સામે 27 મેચમાં 2749 રન બનાવ્યા છે જેમાં 13 સદી સામેલ છે. જો કોહલી આજે (14 જુલાઈ) મેચના ત્રીજા દિવસે વધુ 13 રન બનાવશે તો તે અનુભવી બેટ્સમેન ચંદુ બોર્ડેને પાછળ છોડી દેશે. બોર્ડે વેસ્ટ ઈન્ડિઝ વિરુદ્ધ ટેસ્ટ મેચમાં 870 રન બનાવ્યા છે.
ભારતન જીતાડી ઘણી મેચ
વિરાટ કોહલીની ગણતરી વિશ્વના શ્રેષ્ઠ ખેલાડીઓમાં થાય છે. તેમણે પોતાના દમ પર ભારતીય ટીમને ઘણી મેચો જીતાડી છે, પરંતુ વર્લ્ડ ટેસ્ટ ચેમ્પિયનશિપ 2023ની ફાઇનલમાં તે સારી ઇનિંગ રમી શક્યો નહોતો. આવી સ્થિતિમાં તે વેસ્ટ ઈન્ડિઝ સામે મોટી ઈનિંગ રમવા માંગશે. કોહલી ટીમ ઈન્ડિયા માટે ત્રણેય ફોર્મેટમાં 100થી વધુ મેચ રમનાર એકમાત્ર બેટ્સમેન છે. તેમણે ભારત માટે 105 ટેસ્ટ, 274 ODI અને 115 T20 મેચ રમી છે.
ભારતીય ટીમે મેચ પર મજબૂત પકડ બનાવી લીધી છે. મેચના પહેલા દિવસે વેસ્ટ ઈન્ડિઝના કેપ્ટન ક્રેગ બ્રેથવેટે ટોસ જીતીને પ્રથમ બેટિંગ કરવાનો નિર્ણય લીધો હતો જે બિલકુલ ખોટો સાબિત થયો. વિન્ડીઝની આખી ટીમ 150 રનમાં ઓલઆઉટ થઈ ગઈ. આ પછી રોહિત શર્મા અને યશસ્વી જયસ્વાલે ટીમ ઈન્ડિયા માટે રન બનાવવાની જવાબદારી સંભાળી. રોહિત 103 રન બનાવીને આઉટ થયો. તો યશસ્વી 143 રન બનાવીને ક્રિઝ પર છે. ટીમ ઈન્ડિયા પાસે 162 રનની લીડ છે અને તેની 8 વિકેટ બાકી છે.
