ભાવનગર, તા.૨૦
ભાવનગર જિલ્લામાં આ વખતે મેઘરાજા રિજ્યા હોય તેમ હેત વરસાવી રહ્યા છે. ચોમાસાની સિઝન શરૂ થયાના એક મહિના જ જિલ્લાના બે તાલુકામાં સિઝનનો ૧૦૦% વરસાદ પઙી ગયો છે. જેના કારણે જળ સંકટનો આગામી દિવસોમાં સવાલ નહીં રહે તેવુ મનાઈ રહ્યું છે. આ ઉપરાંત અન્ય તાલુકાઓમાં પણ ૫૦થી ૮૦ ટકા વરસાદ નોધાઇ ગયો છે. આજે ગુરુવારે મહુવા પંથકમાં બપોર સુધીમાં ૪ કલાકમાં ૪ ઇચ વરસાદ પડ્યો હતો જેના કારણે સર્વત્ર પાણી ફરી વળ્યા હતા અને નદી, સરોવરમાં પુર જેવી પરિસ્થિતિ સર્જાઇ છે. અને હજુ ધીમીધારે વરસાદ શરૂ છે.
રાજ્યના હવામાન વિભાગ દ્વારા સમગ્ર સૌરાષ્ટ્ર અને ગુજરાતના મોટાભાગના જિલ્લાઓમાં પાંચ દિવસ સુધી ભારેથી અતિ ભારે વરસાદ પડવાની આપેલી આગાહીના પગલે ભાવનગર જિલ્લામાં ગઈકાલે બુધવારે અપાયેલા રેડ એલર્ટમાં વિવિધ તાલુકાઓમાં બેથી લઈને 6 ઇંચ સુધી ધોધમાર વરસાદ પડ્યો હતો. જેમાં વલભીપુર પંથકમાં છ ઇંચ વરસાદ પડતા સર્વત્ર પાણી ફરી વળ્યા હતા અને હાઇવે પર પણ પાણી આવી જતા ભાવનગર અમદાવાદ રોડને વ્યાપક અસર થવા પામે છે અને ટ્રાફિક ખોરવાયો છે આગાહીના આજના દિવસે ગુરુવારે ભાવનગર જિલ્લાને ઓરેન્જ એલર્ટ અપાયું છે દરમિયાન મહુવા તાલુકામાં આજે સવારથી જ વરસાદી માહોલ વચ્ચ સવારે 8 થી 12 દરમિયાન ચાર કલાકમાં ચાર ઇંચ ધોધમાર વરસાદ પડી ગયો છે પરિણામે મહુવા તાલુકામાં વર્તમાન સીઝનનો સો ટકા વરસાદ પૂર્ણ થઈ જવા પામ્યો છે ચોમાસાની સિઝન શરૂ થઈને એક જ મહિનો થયો છે ત્યાં મહુવા પંથકમાં સીઝનનો સો ટકા વરસાદ થઈ જતા આગામી જળ સંકટ ટળ્યુ હોવાનું મનાઈ રહ્યું છે જોકે હજુ વરસાદના બે માસ બાકી હોય વધુ વરસાદ થવાની શકયતા નકારી શકાતી નથી. આજે ચાર કલાકમાં પડેલા ચાર ઇંચ વરસાદના કારણે મહુવામાં તમામ વિસ્તારોમાં પાણી ભરાઈ ગયા હતા જ્યારે ગ્રામ્ય પંથકમાં પણ કફોડી પરિસ્થિતિનુ નિર્માણ થવા પામ્યૂ છે. નદીઓ બે કાઠે વહેતા પુર જેવી પરિસ્થિતિ સર્જાય છે.
ભાવનગર જિલ્લામાં સિહોર તાલુકો ચોમાસાની સિઝનના પ્રારંભ સાથેજ આગળ રહ્યો છે. આજે ગુરુવારે પણ સિહોરમાં બપોર સુધીમાં દોઢ ઇંચ વરસાદ પડતા અત્યાર સુધીમાં સિઝનનો સો ટકા વરસાદ થઈ જવા પામ્યો છે. આ ઉપરાંત આજે તળાજા પંથકમાં પણ બપોરે ૧૨ વાગ્યા સુધીમાં બે ઇંચ વરસાદ પડયો છે. જ્યારે પાલીતાણા તથા પંથકમાં એક ઇચ વરસાદ પડયો છે. તેમજ અન્ય તાલુકાઓમાં જોરદાર ઝાપટાથી લઇને અડધો ઇંચ વરસાદ નોંધાયો છે. આમ હવામાન વિભાગની આગાહીના પગલે ભાવનગર જિલ્લામાં મેઘરાજા બે દિવસથી સટાસટી બોલાવી રહ્યા છે.
