હવામાન વિભાગની આગાહી અનુસાર આજે કચ્છ, જામનગર, દેવભૂમિ દ્વારકા, જૂનાગઢ, સુરત, નવસારી અને વલસાડ સાથે જ પોરબંદર, રાજકોટ, અમરેલી, ગીર-સોમનાથ, ભાવનગર, બોટાદ, વડોદરા, ભરૂચ, નર્મદા, તાપી અને ડાંગમાં પણ ભારે વરસાદની આગાહી કરવામાં આવી છે.
અંબાલાલ પટેલે રવિવારે જણાવ્યુ હતું કે આગામી 24 કલાક દક્ષિણ ગુજરાત માટે ભારે રહેશે. દક્ષિણ ગુજરાતમાં ગાજવીજ સાથે વરસાદ થશે. મધ્ય ગુજરાતમાં ભારે વરસાદની આગાહી છે. રાજ્યમાં મેઘતાંડવ યથાવત રહેશે. આહવા, ડાંગ, વલસાડમાં અતિભારે વરસાદની આગાહી છે. દક્ષિણ ગુજરાતમાં 12 ઇંચ કરતાં વધુ વરસાદ પડી શકે છે. નવસારી અને સુરતમાં 6થી 8 ઇંચ, મધ્ય ગુજરાતના વિસ્તારોમાં 4 ઇંચથી વધુ વરસાદ પાડવાની આગાહી છે. કચ્છ અને પંચમહાલના કેટલાક ભાગોમાં અતિભારે વરસાદની શક્યતા છે. 24મી જુલાઈથી ગુજરાતમાં વાતાવરણ હળવું થવાનું અનુમાન છે.
હવામાન નિષ્ણાત અંબાલાલ પટેલે જણાવ્યું કે, 27, 28 ,29 જુલાઈએ ભારેથી અતિભારે વરસાદ થશે. સૌરાષ્ટ્ર,કચ્છ,ઉત્તર ગુજરાત, મધ્ય ગુજરાત, દક્ષિણ ગુજરાતના ભાગોમાં ભારેથી અતિભારે વરસાદ રહેશે. બનાસકાંઠા, અમદાવાદ,વડોદરાના ભાગોમાં ભારેથી અતિ ભારે વરસાદની શક્યતા છે. વડોદરાથી અમદાવાદ વચ્ચેના ભાગમાં પણ ભારે વરસાદ થવાની શક્યતા છે.26થી 27 જુલાઈમાં વધુ એક વરસાદી સિસ્ટમ સક્રિય થશે.ભારેથી અતિ ભારે વરસાદના કારણે હવે વરસાદ વિરામ લે તેની રાહ જોઈ રહ્યા છે. જોકે, 24 તારીખથી વરસાદનું જોર ઘટવાનું શક્યતા છે. પરંતુ ફરી 26થી 27 જુલાઈમાં વધુ એક વરસાદી સિસ્ટમ સક્રિય થશે અને તેના કારણે 27થી 3 ઓગસ્ટ સુધી ગુજરાતના ભિન્ન ભિન્ન ભાગોમાં ભારે વરસાદ થવાની સંભાવના વ્યક્ત કરવામાં આવી છે. જે વરસાદી વહન સૌરાષ્ટ્ર, કચ્છ, ઉત્તર ગુજરાત અને મધ્ય ગુજરાતના ભાગોમાં ભારે વરસાદ લાવી શકે છે.
