આગામી તા.8થી દિલ્હીમાં જી.20 શિખર બેઠક માટે વિશ્ર્વના ટોચના રાષ્ટ્રોના વડાઓનું ભારતમાં આગમન શરુ થશે તે પુર્વે સૌથી મોટી ચિંતા અને કસોટી આ રાષ્ટ્રવડાઓની સુરક્ષા અને સમીટ પર કોઈ પ્રકારની મુશ્કેલી નડે નહી તે જોવા માટે હવે ભારતીય હવાઈદળ અને ભૂમીદળ પણ એકશનમાં આવી ગયા છે તથા ખાસ કરીને ચીન-પાક સરહદેથી કોઈ ઘુસણખોરીને રોકવા બન્ને દળોએ એક જબરી કવાયત હાથ ધરી છે.
હવાઈદળે આ સરહદો પરની હવાઈ સુરક્ષા નિશ્ચિત કરવા તેના ભૂમિ પરની હવામાં પ્રહાર કરી શકતા ગાઈડેડ મિસાઈલ સીસ્ટમને એકશનમાં મુકી છે તો તેના અત્યંત આધુનિક રડાર સીસ્ટમ પણ એકટીવ કરી છે તો સૈન્યએ પુર્વ થી પશ્ચિમી કમાન્ડમાં પણ સુરક્ષા ડ્રીલ યોજી હતી. ખાસ કરીને જમીન માર્ગથી ઘુસણખોરી રોકવા સરહદો સીલ કરી છે. ભારતીય હવાઈદળ અને ભૂમીદળ આ માટે 10 દિવસની ખાસ કવાયત તા.1થી10 સુધી ચાલુ રાખશે અને હવાઈદળની તમામ લડાયક તાકાત રાફેલ, સુખોઈ-30, મીગ-29 અને જેગુઆર વિમાનોના કાફલાને પણ ગમે તે ઘડીએ ઉડી શકે તે માટે રેડી-ટુ-ઓપરેશન તબકકે મુકી દીધા છે. આ ઉપરાંત રશિયાથી ખાસ મેળવાયેલા મિસાઈલ પ્રણામી એસ-400 તે પણ પ્રથમ વખત સરહદ પર તૈનાત થઈ છે.
ભારતીય ભૂમીદળની હવે ચાઈનાને ટાર્ગેટ કરીને તૈયાર કરાયેલી બે માઉન્ટેન સ્ટ્રાઈક કૌર્પ્સ જેમા દરેકમાં 70000 જવાનો ભારે શસ્ત્ર સામગ્રી તથા અત્યંત ઉંચી સરહદ પર પણ પહોચી શકે તેવી આર્ટીલરી તમામ રેડી-ટુ-કોમ્બેટ સ્થિતિમાં તૈયાર રાખી છે જે ચીન સાથેની રૂા.3488 કીમીની એલએસી પર નજર રાખશે.
રાજધાની દિલ્હીમાં પણ સ્થાનિક પોલીસ તથા અર્ધલશ્કરી દળોની સાથે સેનાની ખાસ કમાન્ડો ટીમને સ્ટેન્ડ ટુ રખાઈ છે તથા પાટનગર આસપાસના એરબેઝ પર લડાયક વિમાનોના કાફલાને પણ એલર્ટ રખાયા છે તથા તપાસ એજન્સીઓ વચ્ચે સમન્વય માટે ઓપરેશન ડાયરેકશન સેન્ટર પણ કાર્યરત થયું છે. સેનાએ પાટનગરમાં ખાસ રડાર તથા ડ્રોનવિરોધી સીસ્ટમ ગોઠવી છે. વીવીઆઈપી કાફલા પસાર થતા હોય તે સમયે તમામ માર્ગો પર ‘બંધ’ જેવી સ્થિતિ હશે.
