ઈરાનમાં હિજાબ પહેરવા ઉલ્લંઘન કરનાર મહિલાને 10 વર્ષ સુધીની જેલની સજા

ઈરાનમાં મહિલાઓ લાંબા સમયથી હિજાબ પહેરવાની અનિવાર્યતા સામે લડત ચલાવી રહી છે. હિજાબ ન પહેરવાની તેમની માંગને પૂર્ણ કરવા માટે મોટી સંખ્યામાં ઈરાની મહિલાઓ રસ્તા પર ઉતરી હતી અને ભારે પ્રદર્શન કર્યું હતું. આ મહિલાઓને સરકારી વહીવટીતંત્ર તરફથી કડક કાર્યવાહીનો પણ સામનો કરવો પડ્યો હતો. વિરોધ દરમિયાન લેવામાં આવેલી કડક કાર્યવાહીને કારણે મહસા નામની મહિલાનું કસ્ટડીમાં મોત પણ થયું હતું. આ દરમિયાન ઈરાનની સંસદે હિજાબ પર મોટો નિર્ણય લીધો છે અને હિજાબ માટે કડક કાયદો બનાવ્યો છે.
ઇરાનની સંસદે બુધવારે જાહેરમાં ફરજિયાત ઇસ્લામિક હેડસ્કાર્ફ (હિજાબ) પહેરવાનો ઇનકાર કરતી મહિલાઓ અને જેઓ તેમને ટેકો આપે છે તેમના માટે સજાની જોગવાઈના બિલને મંજૂરી આપી છે. ઈરાનની સંસદમાં પસાર થયેલા આ બિલમાં ફરજિયાત હિજાબ ન પહેરતી મહિલાઓને સેવાઓ પૂરી પાડતી સંસ્થાઓના માલિકો માટે સજાની જોગવાઈ છે. જો અપરાધ સંગઠિત રીતે કરવામાં આવે છે, તો ઉલ્લંઘન કરનારાઓને 10 વર્ષ સુધીની જેલની સજા થઈ શકે છે. ઈરાનની 290 સીટવાળી સંસદમાં 152 ધારાસભ્યોએ આ બિલ પાસ કર્યું છે. તેને ‘ગાર્ડિયન કાઉન્સિલ’ દ્વારા મંજૂરીની જરૂર પડશે, જે બંધારણીય ચોકીદાર તરીકે કામ કરે છે. આ ત્રણ વર્ષના પ્રારંભિક સમયગાળા માટે અસરકારક રહેશે.