દિલ્હીમાંથી ISISના શંકાસ્પદ આતંકવાદીની ધરપકડ કરવામાં આવી છે. દિલ્હી પોલીસની સ્પેશિયલ સેલે નેશનલ ઈન્વેસ્ટિગેશન એજન્સી (NIA)ના મોસ્ટ વોન્ટેડ આતંકવાદી શાહનવાઝ ઉર્ફે શફી ઉઝામાની ધરપકડ કરી છે. NIAએ શાહનવાઝ પર 3 લાખ રૂપિયાનું ઈનામ જાહેર કર્યું હતું.
પુણે કેસમાં ફરાર શાહનવાઝ દિલ્હીનો રહેવાસી છે અને વ્યવસાયે એન્જિનિયર છે. તે પુણે પોલીસની કસ્ટડીમાંથી ભાગી ગયો હતો અને દિલ્હીમાં રહેતો હતો. દિલ્હી સ્પેશિયલ સેલ હજુ પણ તેની પૂછપરછ કરી રહી છે. શાહનવાઝની પૂછપરછ બાદ સ્પેશિયલ સેલે દિલ્હીમાં દરોડા પાડ્યા હતા, જેમાં ISના નવા આતંકી મોડ્યુલનો પર્દાફાશ થયો છે. શાહનવાઝની પૂછપરછ બાદ સ્પેશિયલ સેલે 3-4 શંકાસ્પદ લોકોની અટકાયત કરી છે. આ દરમિયાન દિલ્હીમાં મોટી આતંકી ઘટનાની યોજના સામે આવી છે. દિલ્હી પોલીસની સ્પેશિયલ સેલ આ અંગે પ્રેસ કોન્ફરન્સ પણ કરી શકે છે.
