એશિયન ગેમ્સ 2023માં ભારતીય ક્રિકેટ ટીમનું વિજય સરઘસ ચાલુ છે. સેમી ફાઈનલ મેચમાં ટીમ ઈન્ડિયાએ બાંગ્લાદેશને નવ વિકેટે હરાવી ફાઇનલમાં જગ્યા બનાવી લીધી છે. હવે ટીમ ઈન્ડિયાનો મુકાબલો પાકિસ્તાન અને અફઘાનિસ્તાન મેચના વિજેતા સાથે થશે. ફાઇનલમાં પહોંચવાની સાથે, ભારતે ઓછામાં ઓછું સિલ્વર મેડલ પણ નિશ્ચિત કરી લીધો છે. ભારતીય મહિલા ટીમે આ સ્પર્ધામાં આસાનીથી ગોલ્ડ મેડલ જીતી લીધો હતો અને પુરૂષ ટીમ પાસેથી પણ એવી જ અપેક્ષા રાખવામાં આવે છે.
આ સ્પર્ધામાં ભારતીય ટીમને ટોચની પ્રાથમિકતા આપવામાં આવી છે. આવી સ્થિતિમાં ભારતને ક્વાર્ટર ફાઈનલ મેચમાં નેપાળ સામે સીધો રમવાનો મોકો મળ્યો. ભારતે નેપાળને 23 રને હરાવી સેમિફાઇનલમાં પ્રવેશ મેળવ્યો હતો. આ પછી સેમિફાઇનલમાં બાંગ્લાદેશને નવ વિકેટે હરાવી ફાઇનલમાં જગ્યા બનાવી લીધી હતી. હવે ભારત ગોલ્ડ મેડલ જીતવાથી એક જીત દૂર છે.
સેમીફાઈનલમાં શું થયું?
ભારતીય કેપ્ટન રૂતુરાજ ગાયકવાડે ટોસ જીતીને પ્રથમ બોલિંગ કરવાનો નિર્ણય કર્યો હતો. બાંગ્લાદેશની શરૂઆત ખૂબ જ ખરાબ રહી હતી અને પહેલી વિકેટ 18 રનના સ્કોર પર પડી હતી. આ પછી બાંગ્લાદેશની ટીમ નિયમિત અંતરે વિકેટો ગુમાવતી રહી અને 96 રનમાં સમેટાઈ ગઈ. બાંગ્લાદેશ તરફથી ઝાકિર અલીએ સૌથી વધુ અણનમ 24 રન બનાવ્યા હતા. પરવેઝ હુસૈને 23 રનનું યોગદાન આપ્યું હતું. આ બે સિવાય માત્ર રકીબુલ હસન (14 રન) જ ડબલ ફિગર પાર કરી શક્યો. બાંગ્લાદેશના સાત બેટ્સમેન ડબલ ફિગર સુધી પહોંચી શક્યા ન હતા. બે બેટ્સમેન ખાતું પણ ખોલાવી શક્યા ન હતા. સાત અને એક રનના સ્કોર વચ્ચે પાંચ બેટ્સમેન આઉટ થયા હતા. ભારત તરફથી રવિ સાંઈ કિશોરે ત્રણ વિકેટ ઝડપી હતી. વોશિંગ્ટન સુંદરને બે વિકેટ મળી હતી. અર્શદીપ સિંહ, તિલક વર્મા, રવિ બિશ્નોઈ અને શાહબાઝ અહેમદને એક-એક વિકેટ મળી હતી.
97 રનના ટાર્ગેટનો પીછો કરવા ઉતરેલી ભારતની શરૂઆત ખૂબ જ ખરાબ રહી હતી. છેલ્લી મેચમાં સદી ફટકારનાર યશસ્વી જયસ્વાલ ખાતું ખોલાવ્યા વગર જ આઉટ થઈ ગયો હતો. જો કે આ પછી તિલક વર્મા અને ઋતુરાજ ગાયકવાડે વિસ્ફોટક શૈલીમાં રન બનાવ્યા હતા. ચોથી ઓવરમાં જ ભારતનો સ્કોર 50 રન સુધી પહોંચી ગયો હતો. તિલકે નવમી ઓવરમાં પોતાની અડધી સદી પૂરી કરી અને ટીમ ઈન્ડિયા જીતની ઉંબરે આવી ગઈ હતી. ભારતે 9.2 ઓવરમાં એક વિકેટ ગુમાવીને 97 રન બનાવ્યા અને મેચ જીતી લીધી. તિલક વર્મા 26 બોલમાં 55 રન અને ઋતુરાજ ગાયકવાડ 26 બોલમાં 40 રન બનાવીને અણનમ રહ્યા હતા. બાંગ્લાદેશ તરફથી રિપન મંડલે એકમાત્ર વિકેટ લીધી હતી.
