આજે રાજસ્થાન-મધ્ય પ્રદેશ સહિત પાંચ રાજ્યમાં વિધાનસભા ચૂંટણીની જાહેરાત

રાજસ્થાન, છત્તીસગઢ, મધ્ય પ્રદેશ, તેલંગાણા અને મિઝોરમમાં વિધાનસભાની ચૂંટણી યોજાશે. ન્યૂઝ એજન્સી પીટીઆઇએ ટ્વીટ કરીને જાણકારી આપી છે. મધ્ય પ્રદેશ, રાજસ્થાન, છત્તીસગઢ, તેલંગાણા અને મિઝોરમમાં નવેમ્બરના બીજા અઠવાડિયાથી ડિસેમ્બરના પ્રથમ અઠવાડિયા સુધી અલગ અલગ તારીખ અને તબક્કામાં મતદાન યોજાઇ શકે છે. ગત વખતની જેમ રાજસ્થાન, મધ્ય પ્રદેશ, મિઝોરમ અને તેલંગાણામાં એક જ તબક્કામાં ચૂંટણી યોજાવાની શક્યતા છે. જ્યારે છત્તીસગઢમાં બે તબક્કામાં મતદાન થઇ શકે છે.
40 સભ્યો ધરાવતી મિઝોરમ વિધાનસભાનો કાર્યકાળ ડિસેમ્બરમાં પૂર્ણ થઇ રહ્યો છે જ્યારે 90 સભ્યોની છત્તીસગઢ વિધાનસભા અને ત્રણ અન્ય રાજ્યોનો કાર્યકાળ જાન્યુઆરીમાં સમાપ્ત થઇ રહ્યો છે. 230 સભ્યો ધરાવતા મધ્ય પ્રદેશ, રાજસ્થાન (200 સભ્યોની વિધાનસભા) અને તેલંગાણા (119 સભ્યની વિધાનસભા)માં જલ્દી વિધાનસભા ચૂંટણી યોજાવાની છે.
મધ્યપ્રદેશમાં 6 જાન્યુઆરી 2024 પહેલા અને છત્તીસગઢમાં 3 જાન્યુઆરી 2024 પહેલા નવી સરકારો બનાવવી જરૂરી છે. તેવી જ રીતે રાજસ્થાનમાં પણ 14 જાન્યુઆરી 2024 પહેલા નવી સરકારની રચના થવી જોઈએ. આથી ચૂંટણી પંચે ઓક્ટોબરમાં જ પાંચ રાજ્યોમાં ચૂંટણીની તારીખો જાહેર કરવી પડશે. મધ્યપ્રદેશ વિધાનસભાનો કાર્યકાળ 6 જાન્યુઆરી 2024ના રોજ, છત્તીસગઢમાં 3 જાન્યુઆરી 2024ના રોજ, તેલંગાણામાં 16 જાન્યુઆરી 2024ના રોજ, રાજસ્થાનમાં 14 જાન્યુઆરી 2024ના રોજ અને મિઝોરમમાં 17 ડિસેમ્બર 2023ના રોજ સમાપ્ત થશે.