હોટલના રૂમમાં પ્રેમિકાએ દુષ્કર્મનો પ્રતિકાર કરતાં ચપ્પુ માર્યુ

સુરતના પુણા વિસ્તારમાં ઓયો રૂમમાં પ્રેમી દ્વારા ચપ્પુ મારવાની ઘટનામાં નવો ફણગો ફૂટ્યો છે. ઓયો હોટલના રિસેપ્શન પર રજીસ્ટ્રેશન કરાવતાં પ્રેમી પંખીડાના સીસીટીવી સામે આવ્યાં છે. સાથે જ હોસ્પિટલના બિછાનેથી તબિયત સુધરતાં યુવતીનું ચોંકાવનારૂં નિવેદન સામે આવ્યું છે. જેમાં યુવતીએ કહ્યું કે, બળાત્કારનો પ્રતિકાર કરતાં યુવકે તેના ગળા પર ચપ્પુના ઘા ઝીંક્યાં હતાં. ગ્રીષ્મા હત્યાકાંડ જેવી ઘટના બનતા સહેજવારમાં રહી ગઈ હતી.
ઓયો હોટલના બે સીસીટીવી સામે આવ્યાં છે. જેમાં એક સીસીટીવીમાં યુવતી અને યુવક રજીસ્ટ્રેશન કરાવે છે. યુવતી મોં પર દુપટ્ટો બાંધીને આવી હોય છે. જ્યારે કોઈ ત્રાહિત વ્યક્તિ ત્યાંથી પસાર થાય તો મોં છુપાવતી અને સોફા પર બેસતી એ રીતે જોવા મળે છે. જાણે પહેલેથી જ બન્ને વચ્ચે કોઈ અણબનાવ હોય. બીજા સીસીટીવીમાં યુવકના હુમલા બાદ ચાદરમાં વીંટાળીને યુવતીને પોલીસ સહિતના 108નો સ્ટાફ લઈ જતો જોવા મળી રહ્યો છે. યુવતીએ પોલીસને આપેલા ચોંકાવનારા નિવેદનમાં કહ્યું છે કે, યુવક તેણી પર ઓયો હોટલના રૂમમાં દુષ્કર્મ આચરવાનો હતો. તેણે બળજબરી શરૂ કરી હતી. જો કે, પોતે પ્રતિકાર કર્યો હતો. જેથી યુવકે ચપ્પુ કાઢીને ગળાના ભાગે મારી દીધું હતું. સદનસીબે બૂમાબૂમ થઈ હતી. વળી લોહી નીકળતા તે ડરી ગયો હતો. જેથી તેણે વધુ હુમલા કર્યા નહોતા.