ગાઝાની એક હૉસ્પિટલમાં હુમલામાં 500 લોકોના મોત પછી મિડલ ઇસ્ટના અલગ અલગ દેશમાં વિરોધ પ્રદર્શન થઇ રહ્યું છે. આ દેશમાં લેબેનોન, તુર્કી અને ઇરાન પણ સામેલ છે. મીડિયા રિપોર્ટ્સ અનુસાર, વેસ્ટ બેન્કના કેટલાક શહેરોમાં પેલેસ્ટેનિયન નાગરિકોએ વિરોધ પ્રદર્શન કર્યું હતું. આ દરમિયાન સુરક્ષાદળ અને લોકો વચ્ચે અથડામણ પણ થઇ હતી.
ઇઝરાયેલનું કહેવું છે કે ગાઝાની હૉસ્પિટલમાં હુમલો પેલેસ્ટાઇન ઇસ્લામિક જેહાદે કર્યો છે. બીજી તરફ અરબ દેશ આ હુમલાનો આરોપ ઇઝરાયેલ પર લગાવી રહ્યું છે. આટલું જ નહીં અમેરિકા પર પણ લોકો ભડકી ગયા છે અને લેબેનોનમાં તેમના દૂતાવાસને જ હજારો પ્રદર્શનકારીઓએ ઘેરી લીધુ છે. આ લોકોએ અમેરિકન દૂતાવાસને આગના હવાલે કરી દીધુ છે. જો કે, સેનાએ ટિયર ગેસના સેલ છોડીને પ્રદર્શનકારીઓને હટાવ્યા હતા અને આગ પર કાબુ મેળવ્યો હતો. આ હુમલામાં અમેરિકન દૂતાવાસના કોઇ કર્મચારીને નુકસાન પહોંચ્યું છે કે નથી પહોચ્યું તેની કોઇ માહિતી મળી શકી નથી.
બીજી તરફ લેબેનોનમાં જ ફ્રાંસના દૂતાવાસની બહાર પણ પ્રદર્શન કરવામાં આવ્યું હતું. આ દરમિયાન પ્રદર્શનકારીઓએ હિજબુલ્લાહના ઝંડા લહેરાવ્યા હતા. ઇઝરાયેલ અને હમાસ વચ્ચે યુદ્ધ વચ્ચે ઇરાને ધમકી આપી છે. ઇરાનના વિદેશ મંત્રી હુસેન અમીર અબ્દુલ્લાહિયને કહ્યું કે જો ગાઝા પટ્ટીમાં બોમ્બમારો ના રોકાયો તો ઇઝરાયેલે નુકસાન સહન કરવું પડશે.
