ડેન્ગ્યુ સામેની, પ્રથમ અસરકારક દવા તૈયાર

ડેન્ગ્યુ સામેની જંગમાં વૈજ્ઞાનિકોએ મોટી સફળતા મેળવી છે. જોન્સન એન્ડ જોન્સન કંપનીએ ડેન્ગ્યુ તાવની દવા બનાવી છે. જેની હ્યુમન ટ્રાયલ કરવામાં આવી છે. વૈજ્ઞાનિકોના મતે તેમનું ટ્રાયલ સફળ રહ્યું છે. મીડિયા રિપોર્ટ અનુસાર,આ દવા એન્ટિવાયરલ પ્રવૃત્તિ દર્શાવતી પ્રથમ દવા છે. મીડિયા રિપોર્ટ અનુસાર, આ ટ્રાયલ 10 વોલેન્ટિયર પર હાથ ધરવામાં આવી હતી. જેમને ડેન્ગ્યુની રસી મુકવાના 5 દિવસ પહેલા ગોળી આપવામાં આવી હતી. ત્યારબાદ આ ગોળી 21 દિવસ સુધી સતત આપવામાં આવી. ટેસ્ટમાં 10માંથી 6 દર્દીઓના રિપોર્ટ નેગેટિવ આવ્યા છે. ત્યાર બાદ આ દર્દીઓનું 85 દિવસ સુધી નિરીક્ષણ કરવામાં આવ્યું. આ સમયગાળા દરમિયાન દર્દીઓમાં ડેન્ગ્યુના કોઈ લક્ષણો જોવા મળ્યા ન હતા.
ડેન્ગ્યુ તાવ કોઈ લક્ષણ વગરનો હોય છે. શરૂઆતમાં તે સાંધામાં દુ:ખાવો અને ખેંચાણનું કારણ બને છે. આ પછી દર્દીને તીવ્ર તાવ આવે છે. નોંધનીય છે કે ડેન્ગ્યુ મચ્છરના કરડવાથી વિશ્વભરમાં લાખો લોકોને આ તાવ આવે છે. તેનો પ્રકોપ ખાસ કરીને એશિયન અને લેટિન અમેરિકન દેશોમાં જોવા મળે છે. અત્યાર સુધી આ રોગ માટે કોઈ ચોક્કસ દવા કે રસી બનાવવામાં આવી નથી. જોન્સન એન્ડ જોન્સનના રિપોર્ટ અનુસાર, તેમનો બીજો ટેસ્ટ સંપૂર્ણપણે સફળ રહ્યો હતો. એક મોટો પડકાર આ નવી દવાની ઉપલબ્ધતા છે. જો આ દવા મોટા પાયે અસરકારક સાબિત થાય છે, તો ઓછી અને મધ્યમ આવક ધરાવતા દેશોમાં તેની વધુ જરૂર પડશે.