હમાસ અને ઈઝરાયેલ વચ્ચે ચાલી રહેલા યુદ્ધ વચ્ચે અમેરિકાએ પૂર્વ સીરિયા પર હુમલો કર્યો છે. આતંકવાદીઓના ઠેકાણાઓ પર હવાઈ હુમલા કરતી વખતે અમેરિકાએ અહીં ભારે બોમ્બમારો કર્યો છે. અમેરિકી રક્ષા મંત્રાલયે કહ્યું કે આતંકવાદીઓ અમેરિકન ટાર્ગેટ પર હુમલો કરી રહ્યા હતા અને અમે સ્વરક્ષણમાં હુમલો કર્યો. અમેરિકાના મતે આ આતંકી હુમલા ઈરાનના ઉશ્કેરણી પર થઈ રહ્યા હતા.
પૂર્વી સીરિયામાં જ્યાંથી હુમલો થયો હતો ત્યાંથી આતંકીઓ ઓપરેટ કરી રહ્યા હતા. ઈરાન સાથે મળીને ત્યાંના અમેરિકન સૈન્ય મથકો પર આતંકવાદી હુમલા કરવામાં આવ્યા હતા તેથી અમે સ્વ-બચાવમાં બદલો લીધો છે.
પેન્ટાગોન દ્વારા જારી કરાયેલા એક નિવેદન અનુસાર, આજે રાષ્ટ્રપતિ બિડેનના નિર્દેશ પર, ‘યુએસ સૈન્ય દળોએ ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC) અને પૂર્વી સીરિયામાં સંકળાયેલા આતંકવાદી લક્ષ્યો સામે સ્વ-રક્ષણ હુમલા કર્યા. ઈરાક અને સીરિયા સ્થિત આતંકવાદી સંગઠનો ઈરાનના ઉશ્કેરણી પર અમેરિકન સૈન્ય દળો પર જે હુમલાઓ કરી રહ્યા હતા તેનો આ જવાબ છે.
આ હુમલાઓમાં, એક અમેરિકન નાગરિક કોન્ટ્રાક્ટર જ્યારે આશ્રય લેવા માટે કોઈ જગ્યાએ જઈ રહ્યો હતો ત્યારે માર્યો ગયો. આ સમયગાળા દરમિયાન, 21 અમેરિકન કર્મચારીઓને સામાન્ય ઇજાઓ થઈ હતી, પરંતુ તમામ ફરજ પર પાછા ફર્યા છે. બિડેને કહ્યું કે અમેરિકી કર્મચારીઓની સુરક્ષા અમારી સર્વોચ્ચ પ્રાથમિકતા છે. તેમણે કહ્યું, ‘આજની કાર્યવાહી એ હકીકતનો જવાબ છે કે અમેરિકા આવા હુમલાઓને સહન નહીં કરે અને પોતાની, પોતાના કર્મચારીઓ અને પોતાના હિતોની રક્ષા કરશે.’
