વેસ્ટર્ન ડિસ્ટર્બન્સ અને સાઈક્લોનિક સરક્યુલેશનની અસરથી ગુજરાતના વાતાવરણમાં પલટો આવ્યો છે. રાજ્યના હવામાન વિભાગ દ્વારા 27 નવેમ્બર સુધી માવઠાંની આગાહી કરવામાં આવી હતી. આગાહી મુજબ જ છેલ્લા બે દિવસથી રાજ્યના અનેક જિલ્લાઓમાં વરસાદી માહોલ જામ્યો છે. જેને કારણે ખેડૂતોમાં ચિંતા પ્રસરી છે.
ગઈકાલે કચ્છથી લઈને સૌરાષ્ટ્રમાં સાર્વત્રિક વરસાદ નોંધાયો હતો. ત્યારે હવામાન વિભાગે આજે પણ વરસાદ પડવાનીઆગાહી કરી છે. હવામાન વિભાગે રાજ્યના કેટલાક જિલ્લાઓમાં ઓરેન્જ એલર્ટ અને કેટલાક જિલ્લામાં યલો એલર્ટ જાહેર ક્યું છે. હવામાન નિષ્ણાતોના જણાવ્યા પ્રમાણે વેસ્ટર્ન ડિસ્ટર્બન્સ, સાઈકલોનિક સરક્યુલેશન અને ટ્રફ જેવી 3 સિસ્ટમ એક સાથે સક્રીય હોવાથી હજુપણ રાજ્યભરના વાતાવરણમાં પલટો અને વરસાદ રહેશે તથા તાપમાનમાં વધુ ઘટાડો યથાવત રહેશે.
હવામાન વિભાગના ડાયરેકટર ડો. મનોરમા મોહંતી અને હવામાન વિશેષજ્ઞ અંકિત પટેલના જણાવ્યા પ્રમાણે વેસ્ટર્ન ડિસ્ટર્બન્સની સિસ્ટમ આગળ વધી ગઇ છે, જેથી આજથી રાજ્યમાં વરસાદનું જોર ઘટશે. પરંતુ દક્ષિણ ગુજરાત અને સૌરાષ્ટ્રના કેટલાંક ભાગોમાં દિવસ દરમિયાન હળવાથી ભારે-મધ્યમ વરસાદી ઝાપટા તેમજ 30થી 40 કિલોમીટરની ગતિના પવનો ફુંકાવાની શક્યતા છે.
