અમેરિકામાં ગુજરાતી યુવાને તેના સગા મામા, નાના-નાનીની ગોળી મારી હત્યા કરી હોવાની ચોંકાવનારી ઘટના સામે આવી છે. યુવાને પોઇન્ટ બ્લેન્ક રેન્જથી ગોળી મારી હત્યા કરી હતી. ઘટનાને પગલે તાત્કાલિક દોડી આવેલી પોલીસે યુવાનની ધરપકડ કરી તપાસ હાથ ધરી હતી. નોંધનીય છે કે, હત્યારા યુવાનના નાના ગુજરાત પોલીસમાંથી પીઆઇ તરીકે નિવૃત્ત થયા હતા.
મળતી માહિતી અનુસાર, દિલીપભાઇ બ્રહ્મભટ્ટ ગુજરાત પોલીસમાં ફરજ બજાવતા હતા. તેમના પરિવારમાં પુત્રી રિંકુના લગ્ન વિદેશમાં થયા હતા અને તેણે ઓમને જન્મ આપ્યો હતો. જોકે, બાદમાં રિંકુના છૂટાછેડા થાય હતા. જ્યારે પુત્ર યશ અભ્યાસ બાદ અમેરિકામાં સ્થાયી થયો હતો. દિલીપભાઇ અને તેમના પત્ની અમેરિકામાં પુત્ર યશ પાસે આવતા જતાં રહેતા હતા. જ્યારે પોતાના ભાણેજને અમેરિકામાં સેટ કરવા માટે મામા તેને સાથે લઇ ગયા હતા. આ દરમિયાન ઓમ ડ્રગ્સના રવાડે ચડ્યો હોવાનું પણ જાણવા મળી રહ્યું છે.
ભાણેજ ઓમએ ગન વડે મામા, નાના-નાનીને ગોળી ધરબી હત્યા કરી દીધી હતી. તેણે પોઇન્ટ બ્લેન્કથી મામા યશ બ્રહ્મભટ્ટ, નાના દિલીપભાઇ અને નાની બિંદુબેનને ગોળી મારી હતી. ઘટનાને પગલે સમગ્ર વિસ્તારમાં ચકચાર મચી જવા પામી હતી અને ઘટનાની જાણ થતાં પોલીસ તાત્કાલિક દોડી આવી હતી અને હત્યારા ઓમની ધરપકડ કરી વધુ તપાસ હાથ ધરી હતી.
