કચ્છ જિલ્લાના ભુજમાં શિયાળાની સીઝનમાં ચાર મહિના સુધી ચાલતા રણોત્સવને માણવો એ એક અનેરો લહાવો છે. રાજ્ય સરકાર દ્વારા આયોજિત રણોત્સવમાં દર વર્ષની જેમ આ વખતે પણ ખાસ પ્રકારની ટેન્ટ સિટી ઊભી કરવામાં આવી છે, જ્યાં પ્રવાસીઓ પોતાના સમય-શક્તિ મુજબ રોકાઈને નજીકના સફેદ રણના નજારા સાથે લોકસંસ્કૃતિનાં દર્શનને માણી રહ્યાં છે. હાલ શિયાળાની ઠંડીમાં વધારા સાથે લોકોનો ઉત્સાહ પણ રણોત્સવને માણવા વધી રહ્યો છે.
પર્યટકો માટે વિવિધ પ્રકારના કાર્યક્રમો રણોત્સવ સ્થળે પ્રવાસન વિભાગ દ્વારા લોકસંસ્કૃતિને ઉજાગર કરતું ટેન્ટ સિટી ઊભું કરવામાં આવે છે, જ્યાં પર્યટકો માટે વિવિધ પ્રકારના કાર્યક્રમો પ્રસ્તુત કરવામાં આવે છે. લોકસંસ્કૃતિ દર્શાવતા નૃત્ય, સંગીત, નાઈટ શો સહિતના કાર્યક્રમો સ્થાનિક અને બહારના રાજ્યના કલાકારો દ્વારા રજૂ કરવામાં આવતા હોય છે. અહીં એકથી વધુ દિવસ પ્રવાસીઓ રોકાઈને કુદરતી અને લોકકળાનો નજારો માણી શકે છે. ભુજથી ધોરડો વચ્ચે ટેન્ટ સીટી સાથે સ્થાનિક ગ્રામજનો દ્વારા પણ અવનવા ટેન્ટ રોકાણ માટે બનાવવામાં આવ્યા છે.
