ઉત્તરાયણનું પર્વ ગુજરાતીઓ માટે મહાપર્વ છે બાળકોથી લઈને યુવાનો અને વડીલોનો માનિતો તહેવાર ગણવામાં આવે છે. જોકે પતંગ રસિયાઓએ ગત વર્ષની ઉત્તરાયણ કરતાં આ વખતે પતંગ-દોરી માટે ૧૦થી ૧૫ ટકા વધુ કિંમત ચૂકવવી પડશે. કાચા માલની મર્યાદિત આવક તેમજ પતંગ બનાવવાની સામગ્રીની કિંમતમાં થયેલા વધારાને પગલે પતંગ-દોરીની કિંમતમાં વધારો જોવા મળ્યો હતો.
આ વર્ષે પતંગ દોરીના ભાવમાં ૧૦થી ૧૫ ટકાનો વધારો જોવા મળી રહ્યો છે જેમાં ૧૦૦૦ વાર દોરીના ૧૦૦ થી લઈ ૩૦૦ સુધી, ૨૦૦૦ વાર દોરીના ૨૦૦ થી ૭૦૦ અને ૫,૦૦૦ વાર દોરીના ૫૦૦થી હજાર સુધીનો ભાવ જોવા મળી રહ્યો છે, જ્યારે ૧૦૦ નંગ પતંગના ભાવો જોઈતો, સફેદ ચિલ રૂપિયા ૩૦૦થી ૫૦૦ સુધીના જોવા મળી રહ્યા છે.આ વર્ષે પતંગમા વિવિધ વેરાયટીઓ જોવા મળી રહી છે જેમાં બાળકો માટે કાર્ટુન વાળી પતંગો, ૨૦૨૪ વેલકમ, આઈ લવ ઈન્ડિયા, જેવી અનેક વેરાયટીઓ ઉપલબ્ધ છે, જોકે ભાવ વધારા છતાં આ વખતે પતંગ-દોરીનું વેચાણ ગત વર્ષ કરતાં વધશે તેમ પતંગ બજારના વેપારીઓનું માનવું છે. આ વર્ષે પતંગ ખંભાત, નડિયાદ, બરેલી, બરોડા તથા અમદાવાદની અલગ અલગ ફેન્સી પતંગો બજારમાં વેચાણ અર્થે આવી છે. જેની પતંગ રસીકો ઉત્સાહભેર ખરીદી કરી રહ્યાં છે. હવે ઉતરાયણ પર્વને ચારેક દિવસની જ વાર હોય પતંગ દોરાની ખરીદી કરવા તેમજ માંજો ચડાવવા માટે લોકોની ભારે ભીડ જોવા મળી રહી છે.
