BJP MLAએ શિવસેનાના બે નેતાને પોલીસ સ્ટેશનમાં જ મારી ગોળી

મહારાષ્ટ્રના થાણેમાં ભાજપના એક ધારાસભ્યએ શિવસેનાના નેતાને પોલીસ સ્ટેશનમાં ગોળી મારી દીધી. આ ફાયરિંગમાં શિવસેનાના નેતા મહેશ ગાયકવાડને ચાર ગોળી વાગી હતી. આ સાથે અન્ય એક નેતા રાહુલ પાટીલ પણ ખરાબ રીતે ઘાયલ થયા છે. બંને નેતાઓની જ્યુપિટર હોસ્પિટલમાં સારવાર ચાલી રહી છે.
મળતી માહિતી મુજબ આ ગોળી બીજેપી ધારાસભ્ય ગણપત ગાયકવાડે ચલાવી હતી. આ સાથે જ આ સમગ્ર ઘટના ઉલ્હાસનગરના હિલ લાઈન પોલીસ સ્ટેશન પરિસરમાં બની હતી. જણાવવામાં આવી રહ્યું છે કે મહેશ ગાયકવાડ અને ગણપત ગાયકવાડ વચ્ચે ઘણા સમયથી વિવાદ ચાલી રહ્યો હતો. બંને કોઈ વિવાદને લઈને હિલ લાઈન પોલીસ સ્ટેશન પહોંચ્યા હતા અને વાતચીત દરમિયાન ગણપતે મહેશને ચાર ગોળી મારી દીધી હતી. આ ઘટના બાદ ઘાયલ મહેશને ઉલ્હાસનગરની મીરા હોસ્પિટલમાં દાખલ કરવામાં આવ્યો હતો, જ્યાં તેની હાલત નાજુક બન્યા બાદ તેને રાત્રે 11 વાગ્યે થાણેની જ્યુપિટર હોસ્પિટલમાં ખસેડવામાં આવ્યો હતો.
પ્રાથમિક માહિતી મુજબ ભાજપના ધારાસભ્ય ગણપત ગાયકવાડ અને શિવસેનાના શહેર પ્રમુખ મહેશ ગાયકવાડ વચ્ચે જમીનના વિવાદને લઈને ઝઘડો ચાલી રહ્યો હતો. આ વિવાદને કારણે બંને નેતાઓ અને તેમના સમર્થકો હિલ લાઈન પોલીસ સ્ટેશને ભેગા થઈ ગયા હતા. દરમિયાન બંને વચ્ચે ઉગ્ર બોલાચાલી થઈ હતી અને પોલીસ સ્ટેશનની અંદર ફાયરિંગ થયું હતું.ભાજપના ધારાસભ્ય ગણપત ગાયકવાડે શિવસેના શિંદે જૂથના નેતા મહેશ ગાયકવાડ પર અંધાધૂંધ ગોળીબાર કર્યો હતો.