અમદાવાદ-વડોદરા એક્સપ્રેસ હાઇવે પર રોડ અકસ્માત થયો હતો. મુસાફરો ભરેલી એક બસ રેલિંગ તોડીને 25 ફૂટ નીચે પડી હતી જેમાં બે લોકોના મોત થયા છે. આ ઘટના નડિયાદમાં બની હતી.
મળતી માહિતી અનુસાર, અમદાવાદ-વડોદરા હાઇવે પર એક મુસાફરો ભરેલી બસ રેલિંગ તોડીને 25 ફૂટ નીચે પડી હતી. પોલીસ અનુસાર, દૂર્ઘટનામાં કેટલાક લોકો ઘાયલ પણ થયા છે. બનાવની જાણ થતા જ એસપી સહિતના પોલીસ જવાન ઘટનાસ્થળે દોડી આવ્યા હતા.
બનાવની જાણ થતા જ ઘટનાસ્થળે પહોંચેલા એસપી રાજેશ ગઢિયાએ જણાવ્યું કે અમદાવાદથી પૂણે બસ જતી હતી. આ બસમાં 23 મુસાફર સવાર હતા. આ દરમિયાન હાઇવે પર એક સીમેન્ટ ટેન્કર અચાનક ડાબી તરફ વળી ગયો હતો અને બસ સાથે ટકરાયો હતો. જેને કારણે બસના ડ્રાઇવરે કાબુ ગુમાવ્યો હતો અને બસ રેલિંગ તોડીને નીચે પડી હતી જેમાં બે લોકોના મોત થયા હતા જ્યારે અન્ય કેટલાક લોકો ઘાયલ થયા હતા. ટેન્કર ચાલક સામે અકસ્માતનો ગુનો નોંધીને વધુ તપાસ હાથ ધરવામાં આવી છે.
