દેશના ત્રણ રાજ્યોમાં રાજ્યસભાની 15 બેઠકો માટે આજે ચૂંટણી યોજાવા જઈ રહી છે. આવી સ્થિતિમાં જે રાજ્યોમાં મતદાન થવાનું છે તેમાં ઉત્તર પ્રદેશની 10, કર્ણાટકની 4 અને હિમાચલ પ્રદેશની એક બેઠકનો સમાવેશ થાય છે. યુપી અને કર્ણાટકમાં ક્રોસ વોટિંગની શંકા છે, જ્યારે હિમાચલમાં કોંગ્રેસના ઉમેદવારની જીત લગભગ નિશ્ચિત માનવામાં આવી રહી છે.
15 રાજ્યોમાં રાજ્યસભાની 56 બેઠકો ખાલી છે. તેમાંથી 12 રાજ્યોની 41 રાજ્યસભા બેઠકો પર ઉમેદવારો બિનહરીફ ચૂંટાયા છે. રાજ્યસભાની ચૂંટણી માટે મતદાન સવારે 9 વાગ્યાથી શરૂ થશે અને સાંજે 4 વાગ્યા સુધી ચાલશે. આ પછી સાંજે 5 વાગ્યાથી મતગણતરી શરૂ થશેરાત્રે પરિણામ આવવાની ધારણા છે.
ઉત્તર પ્રદેશ- આ રાજ્યમાં કુલ 11 ઉમેદવારો છે. ભાજપ તરફથી સુધાંશુ ત્રિવેદી, આરપીએન સિંહ, અમરપાલ મૌર્ય, તેજપાલ સિંહ, નવીન જૈન, સાધના સિંહ, સંગીતા બળવંત અને સંજય સેઠ છે. જ્યારે સમાજવાદી પાર્ટીએ જયા બચ્ચન, આલોક રંજન અને રામજી લાલ સુમનને મેદાનમાં ઉતાર્યા છે. કર્ણાટક- કર્ણાટકમાં કુલ પાંચ ઉમેદવારો છે. કોંગ્રેસ તરફથી અજય માકન, સૈયદ નાસિર હુસૈન અને જીસી ચંદ્રશેખર મેદાનમાં છે. ભાજપે નારાયણ સા ભાંડગેને જ્યારે જેડીએસે કુપેન્દ્ર રેડ્ડીને મેદાનમાં ઉતાર્યા છે. હિમાચલ પ્રદેશ- અહીં કુલ 2 ઉમેદવારો છે. કોંગ્રેસે અભિષેક મનુ સિંઘવીને પોતાના ઉમેદવાર બનાવ્યા છે. જ્યારે ભાજપે હર્ષ મહાજનને મેદાનમાં ઉતાર્યા છે.
