વડોદરામાં પાર્ક પ્રિવેરા કંપનીના સંચાલકો અને તેમના મળતીયા સામે હોલીડે ટૂરનું પેકેજ આપવાના નામે વધુ એક ઠગાઇની ફરિયાદ નોંધાઈ છે. જેમાં હોલીડે પેકેજ આપવાનું કહીને વડોદરા શહેરના હરણી રોડ પર રહેતા મહિલા સહિત કુલ 4 લોકો પાસેથી 3.01 લાખ રૂપિયા પડાવ્યા હતા. પરંતુ ટુરને આયોજન કરી આપ્યું નહોતું. જેથી મહિલાએ પાર્ક પ્રિવેરા કંપનીના ચાર લોકો સામે ફરિયાદ નોંધાવી છે.
વડોદરા શહેરના હરણી રોડ પર મીરા ચાર રસ્તા પાસેની જીવનપ્રકાશ સોસાયટીમાં રહેતા ચેતનાબેન દિનેશભાઈ ભાવસારે હરણી પોલીસ સ્ટેશનમાં નોંધાવેલી ફરિયાદમાં જણાવ્યું છે કે, વર્ષ-2022માં મારા પતિ દિનેશના મોબાઈલ પર પુંજા માતુરકરનો ફોન આવ્યો હતો હતો અને તેણે જણાવ્યું હતું કે, અમારી પાર્ક પ્રિવેરા હોસ્પિલાટી પ્રા.લી. નામની કંપની હોલીડે પેકેજનું આયોજન કરે છે, જેના દ્વારા સયાજીગંજ વિસ્તારમાં આવેલી હોટલ સયાજીમાં સેમિનારનું આયોજન કરવામાં આવ્યું છે.
જેથી હું અને મારા પતિ દિનેશ રાતના 8 વાગ્યાની આસપાસ સયાજી હોટલમાં ગયા હતા. જ્યાં ગયા બાદ જાણવા મળ્યું હતુ કે, આ કંપનીનું સંચાલન રાહુલ ગુપ્તા સંભાળે છે. તેમના સિનિયર નિશિથ શ્રીવાસ્તવ કંપનીની અલગ- અલગ સ્કીમ બતાવી એક પ્લાનમાં તેઓએ 5 વર્ષની મેમ્બરશીપ અને 35 રાત્રિનો પ્લાન જણાવી તેમાં એક કપલ અને એક બાળકની મેમ્બરશીપની ફી 1,25,000 રૂપિયા ભરવાની થાય છે અને તેઓએ અમને ભારત અને ભારતની બહાર વિંદેશમાં ટૂરમાં લઈ જવાની તેમજ જે- તે હોટલોમાં નાસ્તો તેમજ રહેવાની સગવડ આપવાની વાતચીત કરી હતી.
અમને તેમના વિશ્વાસ આવી જતા મારા પતિએ 1,25,000 રૂપિયા પાર્ક પ્રિવેરાના ખાતામાં ચૂકવ્યા હતા. તેની રિસીપ્ટ શશાંક શર્માએ આપી હતી અને એકવાર અમને જયપુરની ટૂર કરાવી હતી. જોકે, ત્યારબાદ અમે અવાર નવાર આ કંપનીને બહાર ગામ ફરવા જવા માટે આયોજન કરવા અંગેનું જણાવતા તેઓ ગલ્લા તલ્લા કરતા હતા અને અમને કોઈ સંતોષકારક જવાબ આપતા નહોતા.
છેલ્લા બે વર્ષ દરમિયાન મારા પતિ તેઓની વડોદરા ખાતેની ઓફિસમાં અવારનવાર મળવા જતાં હતા. જ્યાં પણ તેઓ ઉડાઉ જવાબો આપતા હતા અને બે વર્ષ સુધી કોઈ બુકિંગ નહી આપીને અમારી સાથે છેતરપિંડી આચરી છે. મારી સાથે જ નહીં પરંતુ, વિમલભાઇ ક્રિશ્યન પાસેથી 1.30 લાખ, વરુણભાઇ દોષી પાસેથી 24 હજાર, મોહમદસફી કડીવાલા પાસેથી 22,500 રૂપિયા પડાવ્યા હતા. આ મામલે મેં પાર્ક પ્રિવેરા હોસ્પિટાલીટી પ્રા.લિ. કંપની, નિશિથ શ્રીવાસ્તવ, પૂજા માતુરકર અને શશાંક શર્મા સામે હરણી પોલીસ સ્ટેશનમાં ફરિયાદ નોંધાવી છે.
