ભારે હિમવર્ષાને કારણે લાહૌલ-સ્પીતિના મોટાભાગના વિસ્તારોમાં મોબાઈલ અને ઈન્ટરનેટ કનેક્ટિવિટી પણ ઠપ થઈ ગઈ છે. સમગ્ર જિલ્લામાં રસ્તાઓ બંધ અને વીજ પુરવઠો ખોરવાતા સામાન્ય જનજીવન ખોરવાઈ ગયું છે. હિમાચલ પ્રદેશમાં મનાલી-અટલ ટનલ, રોહતાંગ ટનલ અને મનાલી-રોહતાંગ પાસ સહિત 374 રસ્તાઓ બ્લોક થઈ ગયા છે. કિન્નૌરમાં 32, ચંબામાં 27 અને કુલ્લુમાં 19 રસ્તાઓ બંધ કરવામાં આવ્યા છે.
હવામાન વિભાગે 11 માર્ચથી આગામી 4 દિવસ સુધી રાજ્યમાં ભારે હિમવર્ષા અને વરસાદની આગાહી કરી છે. લોકોને સતર્ક રહેવા અપીલ કરવામાં આવી છે. ડિઝાસ્ટર મેનેજમેન્ટ ઓથોરિટી (SDMA) અનુસાર, લાહૌલ-સ્પીતિ જિલ્લામાં સૌથી વધુ 285 રસ્તાઓ બ્લોક છે. આ કારણે લેહ-લદ્દાખ સહિત 5 જિલ્લા બાકીની દુનિયાથી કપાઈ ગયા છે. પોળ ડિવિઝનમાં 97 ટ્રાન્સફોર્મર અટવાયા છે. કલ્પામાં 93 અને નિચર સબડિવિઝનમાં 3 ટ્રાન્સફોર્મર બંધ પડ્યા છે.
અટલ ટનલ રોહતાંગના દક્ષિણ પોર્ટલમાં હિમસ્ખલનને કારણે રસ્તો બંધ થઈ ગયો હતો, જેને ટૂંક સમયમાં ખોલવામાં આવશે. સોલંગનાલાથી અટલ ટનલ રોહતાંગ સુધીનો રસ્તો સાફ થઈ ગયો છે, પરંતુ કાળો બરફ જામી ગયો છે. ડીએસપી મનાલી કેડી શર્માએ એલર્ટ જારી કરીને કહ્યું કે અટલ ટનલ અત્યારે બંધ રહેશે. પ્રવાસીઓને જવા દેવામાં આવશે નહીં. હવામાન વિભાગની આગાહી મુજબ આગળની સૂચનાઓ જારી કરવામાં આવશે.
