સોમવારે સમગ્ર ગુજરાત ધુળેટીના રંગે રંગાઈ ગયું છે. અમદાવાદ, રાજકોટ, સુરત, વડોદરા સહિતનાં મહાનગરોનું યુવાઘન ડીજેના તાલે ઝૂમી ઊઠ્યું હતું. નાના -મોટા સૌ કોઈ એકબીજાને રંગ લગાવી ધુળેટીની મજા માણી હતી. ડીજેના તાલે ક્યાંક ડાન્સ તો ક્યાંક લોકોએ ગરબા રમી મોજ માણી હતી. છેક રાત સુધી લોકોનો ઉત્સાહ અવિરત જોવા મળી રહ્યો છે.
ગાંધીનગર લોકસભા પરિવાર આયોજિત ધુળેટી મહોત્સવમાં કેન્દ્રીય ગૃહ અને સહકારિતા મંત્રી અમિત શાહ અને ગુજરાતના મુખ્યમંત્રી ભૂપેન્દ્ર પટેલ હાજર રહ્યા હતા. ભૂપેન્દ્ર પટેલ અને અમિત શાહે એકબીજાને રંગ લગાવી કાર્યકરો સાથે ધુળેટીની ઉજવણી કરી હતી.
રાજ્યપાલ આચાર્ય દેવવ્રતએ આજે રાજભવનમાં લેડી ગવર્નર દર્શનાદેવી અને રાજભવન પરિવારના બાળકો સાથે ધુળેટીની ઉજવણી કરી હતી. કુદરતી ફૂલોમાંથી બનેલા પ્રાકૃતિક રંગોથી રાજ્યપાલ આચાર્ય દેવવ્રતજીએ સૌને રંગ્યા હતા. રંગોના આ ઉત્સવે રાજ્યપાલે સૌને પ્રકૃતિ તરફ પાછા વળવાનો સંદેશ આપ્યો હતો. આ સાથે રસાયણમુક્ત કૃષિ-પ્રાકૃતિક કૃષિ પદ્ધતિ અપનાવીને સ્વસ્થ, નિરોગી અને પ્રસન્ન જીવનની શુભકામનાઓ પાઠવી હતી. રાજભવનમાં ધુળેટી પર્વની ઉજવણી દરમિયાન રાજ્યપાલ આચાર્ય દેવવ્રતને રાજભવન પરિવારના બાળકોએ રંગોથી રંગ્યા હતા. સૌએ રાજસ્થાની હોળી ગીતોની પણ મજા માણી હતી.
